Мясцовыя Саветы дэпутатаў павінны больш працаваць з насельніцтвам - А.Лукашэнка /

25 красавіка, Мінск /Уладзімір Васількоў - БЕЛТА/. Мясцовыя Саветы дэпутатаў павінны больш працаваць з насельніцтвам. Аб гэтым заявіў сёння Прэзідэнт Беларусі Аляксандр Лукашэнка, адказваючы на пытанні журналістаў на ўчастку, дзе ён галасаваў у ходзе мясцовых выбараў, перадае карэспандэнт БЕЛТА. "Трэба мець на ўвазе, што нашай Канстытуцыяй абсалютна дакладна агавораны функцыі і паўнамоцтвы ўсіх органаў улады. Будзем казаць шчыра: каму больш дадзена, з тых больш і пытаецца. Каму ў нас больш за ўсё паўнамоцтваў дадзена? Вядома, Прэзідэнту, з яго і больш пытаецца. Затым у нас ідуць органы трох галін улады. Ім таксама нямала дадзена, і з іх попыт значны, асабліва з урада, - адзначыў Аляксандр Лукашэнка. - А саветы ў нас - толькі прадстаўнічы орган улады. Яны не фарміруюць нават выканкамы, не прызначаюць, а толькі ўзгадняюць кіраўнікоў мясцовых выканаўчых органаў". Разам з тым, на думку Прэзідэнта, мясцовыя саветы ў нас недастаткова кантактуюць з народам. "Я асабіста хацеў бы, каб пасля гэтых выбараў сітуацыя кардынальна змянілася. Мясцовыя саветы павінны працаваць з насельніцтвам, вельмі шмат працаваць", - падкрэсліў беларускі лідар. Аляксандр Лукашэнка нагадаў аб сваіх неаднаразовых выказваннях аб тым, што саветы ў Беларусі, нароўні з прафсаюзамі і іншымі грамадскімі арганізацыямі, з'яўляюцца тымі "слупамі", на якіх трымаецца грамадскае жыццё. Кіраўнік дзяржавы падкрэсліў, што кандыдатам у любым выпадку трэба выконваць тое, што яны абяцалі сваім выбаршчыкам. "Гаспадарамі ў сваіх раёнах саветы па нашым заканадаўстве наўрад ці могуць быць. У іх не тая функцыя. Але яны разам з выканаўчай уладай нясуць гэты цяжар, гэту адказнасць, і ўжо разам з імі яны павінны станавіцца гаспадарамі той ці іншай тэрыторыі, - сказаў Прэзідэнт. - Таму я б вельмі прасіў, каб мы не вельмі патрабавалі з мясцовых Саветаў дэпутатаў рашэнняў тых пытанняў, за якія яны не нясуць адказнасці і на якія ў іх няма нават паўнамоцтваў, сіл, сродкаў і г.д.". Аляксандр Лукашэнка сёння прагаласаваў на ўчастку №1 Веснянскай выбарчай акругі №39.-0-