Міжнародны фестываль "Славянскі базар у Віцебску" закліканы паказаць свету Беларусь - А.Тозік

17 лютага, Сянно /Дзіяна Курыло - БЕЛТА/. Міжнародны фестываль "Славянскі базар у Віцебску" павінен паказаць свету Беларусь. Такі пункт гледжання, адказваючы на пытанне карэспандэнта БЕЛТА, выказаў намеснік прэм'ер-міністра Беларусі Анатоль Тозік. За гады свайго існавання фестываль заваяваў сусветную папулярнасць. Яго галоўнай задачай цяпер павінна стаць аб'яднанне славянскіх культур і прадстаўленне свету ўнікальнай культуры Беларусі, лічыць Анатоль Тозік. "Мы недаацэньваем сябе, а нам ёсць што паказаць. Натуральнасць, шчырасць, народнасць беларусаў заваёўваюць велізарныя аўдыторыі", - сказаў ён. "Надыходзячы ХХ Міжнародны фестываль мастацтваў "Славянскі базар у Віцебску", без сумневу, будзе падзеяй, якая запамятаецца ў культурным жыцці. Праект канцэпцыі юбілейнага фестывалю распрацаваны, цяпер ён абмяркоўваецца. Прычым аргкамітэт адкрыты новым ідэям і гатовы іх прыняць", - сказаў Анатоль Тозік.-0-