Міжнародны фестываль сучаснай харэаграфіі адкрываецца ў Віцебску

Урачыстае адкрыццё XXVI Міжнароднага фестывалю сучаснай харэаграфіі (IFMC) адбудзецца сёння ў Віцебску, паведамілі БЕЛТА ў Цэнтры культуры "Віцебск".

Свае пастаноўкі прыхільнікам фестывалю прадставяць тэатр "Балет Яўгена Панфілава" (Перм), тэатр сучаснай харэаграфіі "D.O.Z.S.K.I" (Мінск), балет Street jazz (Масква), Arts printing house (Вільнюс), "Кіеў мадэрн-балет" (Украіна), а таксама Нацыянальны акадэмічны Вялікі тэатр оперы і балета Рэспублікі Беларусь, які выканае балет "Шэсць танцаў".

Стартавай пляцоўкай форуму сёлета стаў Нацыянальны акадэмічны Вялікі тэатр оперы і балета, на сцэне якога 17 лістапада ў рамках фестывалю выступілі Пермскі дзяржаўны тэатр "Балет Яўгена Панфілава" (Расія) і кампанія танца "Фрэска" (Ізраіль). У Віцебску фестывальныя выступленні стартавалі 19 лістапада і працягнуцца па 24 лістапада. Пляцоўкамі мерапрыемстваў IFMC з'яўляюцца канцэртная зала "Віцебск" і Нацыянальны акадэмічны драматычны тэатр імя Якуба Коласа.

Галоўная падзея фестывалю - конкурс сучаснай харэаграфіі. Сёлета ў ім бяруць удзел толькі беларускія калектывы. Папярэдні адборачны відэатур з 22 заяўленых прайшлі 13 калектываў. Ацэньваць выступленні ўдзельнікаў будзе прадстаўнічае журы пад старшынствам лаўрэата міжнародных конкурсаў, мастацкага кіраўніка тэатра сучаснай харэаграфіі "Кіеў Мадэрн-Балет" Раду Поклітару (Украіна), сустаршынёй будзе балетны крытык, музыказнавец, старшыня экспертнага савета Нацыянальнай тэатральнай прэміі Расіі "Залатая маска" Ларыса Барыкіна (Расія). У склад журы таксама ўвайшлі Юрый Траян (Беларусь), Святлана Гуткоўская (Беларусь), Карл-Ёзэф Нелес (Германія), Інгрыда Гербютавічытэ (Літва), Аляксандр Пепяляеў (Расія).

Заснавальнікамі фестывалю выступаюць Віцебскі аблвыканкам, Міністэрства культуры Беларусі, Віцебскі гарвыканкам, Нацыянальны акадэмічны тэатр оперы і балета Рэспублікі Беларусь. Арганізатар - Цэнтр культуры "Віцебск".