Міжнародны турнір па міні-футболе сярод аматараў прайшоў у Гарадку
На якасна новы ўзровень спаборніцтвы выйшлі тры гады таму, калі атрымалі гараддокскую прапіску. Дзякуючы дапамозе мясцовых уладаў, яны сталі сапраўдным футбольным фестывалем, які не абмяжоўваецца баталіямі на полі.
На яго гульцы прыязджаюць з сем'ямі, прычым жонкі і дзеці выступаюць не толькі ў ролі заўзятараў, але самі могуць заняцца актыўным адпачынкам. Да паслуг дзяцей і дарослых розныя атракцыёны, выязны гандаль, таксама прадугледжаны выступленні артыстаў і дыскатэка.
Сёлета на «Кубку» сабралася рэкордная колькасць каманд з Беларусі, Расіі і Латвіі — звыш дваццаці. Самай вядомай і чаканай у райцэнтры стала, вядома ж, дружына зорак беларускай эстрады «Арт-Старс» на чале з капітанам кампазітарам і выканаўцам, майстрам спорту міжнароднага класа па кікбоксінгу Альбертам Скараходам.
— Мы ўдзельнічаем у розных фестывалях, дабрачынных матчах розных фарматаў, таксама гулялі на пяці чэмпіянатах свету па футболе сярод артыстаў. У Гарадок прыехалі сваім асноўным складам, каб набрацца вопыту, бо тут сабраліся добрыя футбалісты, — сказаў Альберт Скараход. — Таксама тут адбудзецца наш гадзінны канцэрт, які, спадзяюся, спадабаецца мясцовай публіцы.
На папярэднім этапе сапернікаў разбілі на падгрупы, па выніках барацьбы ў якіх вызначылася васьмёрка наймацнейшых. Далей чэмпіёна вызначалі ў стадыі плэй-оф. У выніку двух напружаных гульнявых дзён лепшай стала дружына «Калінпрадукт» (Новалукомль), другое месца дасталася «Арт-Старс», трэцяе — у «Інструменткомплект» (Барысаў).
На цырымоніі урачыстага адкрыцця «Кубка хмелю» прысутнічаў старшыня абласнога Савета дэпутатаў Уладзімір Церанцьеў.
— Ад фестывалю ў мяне толькі яркія пазітыўныя эмоцыі, — сказаў Уладзімір Уладзіміравіч. — Гэта не проста спартыўнае мерапрыемства, тут пануе цёплая хатняя абстаноўка. Шмат хто прыехаў сем'ямі. Пакуль мужы гуляюць у футбол, дзеці бегаюць на свежым паветры, спрабуюць беларускую кухню. Таксама людзі з розных краін, якія захапляюцца адным відам спорту, могуць пагутарыць адзін з адным.
Адным з ганаровых гасцей спаборніцтваў стаў легенда савецкага і беларускага спорту Анатоль Байдачны.
— Я ўсё жыццё прысвяціў футболу і рады, што ён да гэтага часу застаецца папулярным, — паведаміў Анатоль Мікалаевіч. — Усе, хто сабраўся ў Гарадку, з'яўляюцца гарачымі прыхільнікамі гульні №1, якія, нягледзячы на выхадныя, выйшлі на газон, каб прадэманстраваць сваё майстэрства.
