Міжнародны турнір па пляжным футболе пройдзе ў Віцебску 20-22 жніўня

18 жніўня, Віцебск /Сяргей Кочатаў - БЕЛТА/. Каманды з пяці краін прымуць удзел у міжнародным турніры па пляжным футболе "Кубак дружбы", які ўпершыню пройдзе ў Віцебску з 20 па 22 жніўня. Аб гэтым карэспандэнту БЕЛТА паведамілі ва ўпраўленні фізічнай культуры, спорту і турызму аблвыканкама. У абласным цэнтры збяруцца зборныя Беларусі, Літвы, Латвіі, Малдовы і каманда Калінінградскай вобласці (Расія). Першапачаткова ўдзельнікі будуць разбіты на дзве групы. Па выніках групавога этапу вызначыцца дуэт фіналістаў, у які ўвойдуць пераможцы груп. Трэцяе прызавое месца турніру разыграюць каманды, якія занялі ў групах другія месцы. Пераможцы і прызёры будуць узнагароджаны кубкамі і медалямі, лепшыя спартсмены па гульнявых амплуа таксама будуць заахвочаны памятнымі прызамі. Правядзенне турніру стала магчымым дзякуючы будаўніцтву пакуль адзінага ў горадзе поля для гульні ў пляжны футбол. Спартыўны аб'ект з трыбунамі на 450 месцаў размясціўся ў добраўпарадкаванай зоне адпачынку ў пойме ракі Віцьба ў цэнтральнай частцы горада. На яго ўзвядзенне было затрачана больш за Br1 млрд. Вялікую дапамогу ў з'яўленні такога аб'екта з новым для горада функцыянальным прызначэннем аказала Беларуская федэрацыя футбола, якая таксама падтрымала правядзенне міжнароднага турніру па гэтым відзе спорту. Міжнародны турнір стане своеасаблівай прэзентацыяй новага спартыўнага аб'екта ў горадзе. Стадыён для пляжнага футбола ўваходзіць у комплекс спартзбудаванняў, якія створаны ў зоне адпачынку на Віцьбе. Тут таксама размясціліся поле са штучным пакрыццём для міні-футбола, пляцоўкі для гульні ў пляжны валейбол, баскетбол і тэнісны корт. Уздоўж берага Віцьбы завяршаецца пракладка лыжаролернай трасы працягласцю больш за 3 км.-0-