Міжраённае кардыялагічнае аддзяленне адкрыецца ў маі ў Наваполацку
Міжраённае кардыялагічнае аддзяленне з магчымасцю правядзення інтэрвенцыйных умяшанняў адкрыецца ў маі ў Наваполацку на базе мясцовай бальніцы. Пра гэта паведаміў журналістам галоўны пазаштатны кардыёлаг галоўнага ўпраўлення па ахове здароўя Віцебскага аблвыканкама Уладзіслаў Падпалаў.
Апошнія пяць гадоў у Віцебскай вобласці актыўна ўкаранялі высокатэхналагічныя метады лячэння хвароб сэрца. Працуюць дзве катэтэрызацыйныя лабараторыі ў Віцебску, такая лабараторыя адкрылася нядаўна ў Оршы, а з мая з'явіцца і ў Наваполацку разам з адкрыццём міжраённага кардыялагічнага аддзялення на базе гарбальніцы. "Дзякуючы гэтаму практычна ўся вобласць будзе ахоплена аказаннем дапамогі на еўрапейскім узроўні хворым пры вострым коронарным сіндроме, інфаркце міякарда. Жыхары Наваполацка, Полацка і ўсяго раёна трапяць у двухгадзінную зону дастаўкі ў міжраённае аддзяленне. Калі ім будзе паказана інтэрвенцыйнае ўмяшанне, то яно будзе адразу ж праводзіцца, што значна зніжае верагоднасць лятальнага зходу", - адзначыў Уладзіслаў Падпалаў.
Новая лабараторыя пры неабходнасці будзе абслугоўваць пацыентаў шасці найбліжэйшых раёнаў вобласці. У перспектыве катэтэрызацыйная лабараторыя з'явіцца ў Мёрах на базе будучага кардыялагічнага цэнтра, узвядзенне якога стане вынікам дзяржаўна-прыватнага партнёрства.
Па дадзеных Віцебскага абласнога клінічнага кардыялагічнага цэнтра, павышаны артэрыяльны ціск рэгіструецца амаль у 30% дарослага насельніцтва вобласці. У цэнтры з 2010 года вядзецца абласная база пацыентаў, якія перанеслі кардыяхірургічныя ўмяшанні, у якой налічваецца больш за 2 тыс. чалавек з імплантаванымі электракардыёстымулятарамі. У вобласці апошнімі гадамі зніжаецца ўзровень смяротнасці ад хвароб сістэмы кровазвароту: у агульнай структуры смяротнасці яны не перавышаюць 47% (па Беларусі 55-56%).
У Дзень прафілактыкі хвароб сэрца, які ў гэтым годзе будзе адзначацца 18 красавіка, у Віцебскім абласным клінічным кардыялагічным цэнтры правядуць гарачую лінію па пытаннях прафілактыкі сардэчна-сасудзістых захворванняў. Званкі прымаюцца з 10.00 да
15.00 па тэлефоне 8 (0212) 52-69-27.