Міліцыя перайшла на ўзмоцнены варыянт нясення службы для бяспекі грамадзян у перыяд святаў

Задзейнічаны ўвесь асабовы склад упраўлення ўнутраных спраў, павялічана колькасць патрулёў на вуліцах. Напярэдадні сумесна з прадстаўнікамі ЖКГ і МНС былі абследаваны гарышчы і сутарэнні ў дамах, прылеглых да месцаў правядзення масавых мерапрыемстваў. Таксама правераны ўсе памяшканні прадпрыемстваў грамадскага харчавання, піцейныя ўстановы Віцебска і вобласці. Па словах намесніка начальніка міліцыі грамадскай бяспекі УУС аблвыканкама Ігара Скарынавіча, асаблівых прэтэнзій да тэхнічнай аснашчанасці, забеспячэння аховы і працы відэасістэм (дзе яны маюцца) няма.

У навагоднюю ноч у Віцебску ўваход на плошчу Перамогі будзе ажыццяўляцца праз кантрольна-прапускныя пункты з даглядам. Забаронена праносіць зброю і яго муляжы, калюча-рэжучыя прадметы, піратэхніку, спіртныя напоі і піва, а таксама прахалодныя напоі ў шкляной, непразрыстай тары і аб'ёмам больш за паўлітра.

— Можна ўзяць з сабой тэрмас з гарбатай ці кавай, але наогул на плошчы будуць працаваць кафэ, дзе можна таксама і перакусіць, — дадаў Ігар Альфрэдавіч. — Зразумела, што свята суправаджаецца ўжываннем алкаголю, але калі чалавек не проста падпіты, а п'яны, што праяўляецца ў яго паводзінах, то яму будзе прапанавана вярнуцца дадому. Калі не ўдаецца ўсталяваць месца жыхарства або за грамадзянінам няма каму прыехаць, а мы не можам яго даставіць дадому, то яго накіроўваюць у спецыяльны ізалятар. Людзьмі ў стане моцнага алкагольнага ап'янення або алкагольнай комы займаецца хуткая дапамога.

Усе камеры на плошчы Перамогі працуюць, відэасігнал выведзены на дзяжурную частку, дзе за маніторамі будзе сачыць супрацоўнік. На іншых пляцоўках будуць задзейнічаны лакальныя камеры і відэасістэмы, устаноўленыя прадпрыемствамі.

Аналагічныя меры бяспекі будуць прыняты і ў райцэнтрах.

Кацярына Князева, "Віцебскія весці"