Міёрскі завод па вытворчасці белай жасці асвойвае новыя рынкі і мадэрнізуе вытворчасць
Сёлета плануецца вырабіць 72 тысячы тон белай бляхі, у 2025 – 2026 гадах – 120 тысяч. І выйсці на праектную магутнасць – выканаць задачу, пастаўленую Прэзідэнтам падчас наведвання завода, да канца дзесяцігоддзя. Перадумовы для росту ёсць. У сакавіку, напрыклад, бляхі высокай якасці было выраблена і рэалізавана 7200 тон – максімальная колькасць у месяц за 4-гадовую гісторыю завода. Пра гэта карэспандэнту «ВВ» паведаміў генеральны дырэктар «Металапракатнай кампаніі» Сяргей Ісаеў.
Рух наперад характэрны і для ўсяго мінулага года. Кампанія вырабіла і адгрузіла 63 тыс. т белай бляхі, рэнтабельнасць склала больш за 8 %. З мая 2023 года завод перайшоў ад працы па давальнiцкай схеме на ўласнае вытворчасць прадукцыі. Стаў лідарам у конкурсе «Імпартазамяшчэнне» як лепшае прадпрыемства-вытворца айчыннай прадукцыі, што паспяхова канкуруе на ўнутраным і знешнім рынках. Замест матэрыялаў, што раней пастаўляліся з Еўрасаюза, міёрскія металургі пачалі выкарыстоўваць айчынныя, а таксама вырабленыя ў Расійскай Федэрацыі або КНР. Гэта аказалася нават выгадней. Выйгралі па якасці і па цане. Акрамя таго, міёрская белая бляха атрымала Гран-пры конкурсу «Прадукт года – 2023» у намінацыі «Металапрадукцыя». А ўдзел у міжнароднай выставе «Прадэкспа-24» дазволіў заключыць дадатковыя пагадненні на пастаўку прадукцыі на знешні рынак.
– Маем доўгатэрміновы план развіцця, разлічаны на дзесяць гадоў. Але для выхаду на вытворчыя магутнасці нам трэба яшчэ шмат зрабіць, – адзначыў Сяргей Ісаеў. Хоць і сёння робіцца нямала. Завод самастойна закупляе неабходную сыравіну для вытворчасці. Створаны запас для бесперабойнай працы на працягу другога квартала.
– Канкурэнтаздольнасць прадукцыі металапракату вызначаецца літаральна сотымі долямі міліметра. Заводам асвоена тэхналогія выпуску высакаякаснай белай жасці таўшчынёй ад 0,13 да 0,5 мм, шырынёй ад 750 – 1250 мм. Найбольш запатрабаванай у нашым партфелі заказаў з'яўляецца белая жасць падвойнай халоднай пракаткі таўшчынёй ад 0,13 – 0,17 мм. У расійскіх вытворцаў яна пачынаецца ад 0,17 мм. Гэтым і бярэм. Рэалізацыю на расійскім рынку павялічылі за год практычна ў 2,5 раза, – падкрэсліў кіраўнік. – Актыўна асвойвае расійскі рынак у гэтым жа сегменце кітайскі вытворца, у якога і сыравіна свая, і лагістыка больш удалая, і цана тавару ніжэйшая. Значыць, нам трэба шукаць рэзервы для ўтрымання цаны, прапаноўваць тавар больш высокай якасці, прабіваць заслоны.
Ёсць партнёры, адпрацавана лагістыка рамонту і пастаўкі на завод запасных частак, механізмаў, у якіх скончыўся тэрмін эксплуатацыі. Тое, што раней паступала з ЕС, цяпер вырабляюць у Беларусі, Расіі, Кітаі.
Паляпшэнне вытворчай і фінансавай сітуацыі заводчане звязваюць з заснавальнікам «Металапракатнай кампаніі» ААТ «Белцветмет», якое два гады аказвае прадпрыемству ўсебаковую падтрымку. Сваю станоўчую ролю адыграў статус рэзідэнта СЭЗ «Віцебск». У выніку вытворчы працэс набыў стабільнасць, у завода з'явіліся ўласныя грошы, магчымасць займацца мадэрнізацыяй.
У ліку найбліжэйшых планаў генеральны дырэктар назваў закупку яшчэ аднаго электрамоставога крана для перамяшчэння паўфабрыкатаў і гатовых рулонаў. Той, што пастаўлены падчас будаўніцтва, з існуючым аб'ёмам не спраўляецца. Дадатковы паскорыць перадачу прадукцыі на склад, а таксама яе адгрузку.
Закупляецца завод і шліфавальны станок, які неабходны для шліфавання ролікаў на лініі луджэння. Раней гэту паслугу заказвалі на баку і плацілі за яе немалыя грошы. Цяпер будуць самі адказваць за хуткасць і якасць шліфавання. А яшчэ, кажа Сяргей Ісаеў, вузкае месца вытворчасці – лінія рэзкі. Попыт на ліставы цынк расце, задавальняць яго наяўнымі магчымасцямі становіцца ўсё цяжэй. Патрэбна мадэрнізацыя і гэтага вытворчага ўчастка. Маюць намер таксама набыць станок лазернага тэкстуравання, што дазволіць палепшыць адгезію (зчапленне) сталёвай асновы і знешні выгляд белай цынкавай жалезіны.
Калектыў выконвае свае абавязацельствы перад заказчыкамі, не мае запазычанасці па абавязковых плацяжах, працуе з станоўчымі фінансавымі вынікамі. Тут клапоцяцца не толькі пра вытворчасць, але і пра выгоды для людзей. У пакоі прыёму ежы на вытворчых участках усталявалі халадзільнікі, мікрахвалевыя печы, электрачайнікі. Уласны жылы фонд завода налічвае 110 кватэр, таму ёсць магчымасць забяспечыць жыллём спецыялістаў прадпрыемства. Адным словам, сацыяльны пакет добры.
Усе, з кім удалося пагутарыць, казалі: ганарацца тым, што працуюць на такім прадпрыемстве, што змаглі асвоіць найскладанейшы тэхналагічны працэс, што будуць працаваць так, каб слава пра беларускую белую цынкавую жалезіну грымела па ўсім свеце.
ДАРЭЧЫ: Асноўным спажыўцом беларускай цынкавай жалезіны з'яўляецца Расія, куды з Міёр адпраўляюць да 80 % прадукцыі. Летась рынкі збыту пашырылі за кошт Арменіі, Казахстана, Азербайджана. Першыя экспартныя пастаўкі ажыццёўлены для касметычных і фармацэўтычных прадпрыемстваў Узбекістана. Вывучаюцца магчымасці супрацоўніцтва з краінамі Паўночнай Афрыкі і Азіі. Колькасць контрагентаў пастаянна павялічваецца. Сёння іх каля 40.