Мабільныя групы ў Віцебскай вобласці падчас пасяўной узмоцняць маніторынг арганізацый АПК
Дзяржаўная інспекцыя працы на перыяд правядзення веснавых палявых работ узмоцніць маніторынг работы арганізацый аграпрамысловага комплексу Віцебскай вобласці. Аб гэтым карэспандэнту БЕЛТА паведаміў першы намеснік начальніка Віцебскага абласнога ўпраўлення дэпартамента дзяржаўнай інспекцыі працы Міністэрства працы і сацыяльнай абароны Сяргей Ануфрыеў.
Паводле яго слоў, аператыўныя мабільныя групы ў складзе дзяржінспектараў працы, работнікаў праваахоўных органаў, МНС, пракуратуры і прадстаўнікоў іншых зацікаўленых ведамстваў дзейнічаюць у рэгіёне на пастаяннай аснове, правяраючы на прадпрыемствах і ў арганізацыях рознай формы ўласнасці выкананне патрабаванняў і норм па ахове працы. На перыяд пасяўной самае пільную ўвагу членаў мабільных груп будзе накіравана на забеспячэнне бяспечных умоў працы ў сельгаспрадпрыемствах.
"Дадзеная сфера ўваходзіць у лік найбольш траўманебяспечных. Так, у 2011 годзе ў арганізацыях АПК рэгіёну зафіксавана 11 выпадкаў смяротнага і 29 цяжкага траўматызму, у 2012-м - адпаведна 2 і 19. За першы квартал гэтага года ў параўнанні з аналагічным перыядам 2012-га зноў намяцілася трывожная тэндэнцыя: зафіксаваны адзін выпадак гібелі і пяць цяжкага траўміравання работнікаў", - канстатаваў першы намеснік начальніка ўпраўлення. Ён падкрэсліў, што шматлікія парушэнні правілаў аховы працы дапускаюцца ў палявых умовах і пры правядзенні рамонтных работ у механічных майстэрнях.
Сяргей Ануфрыеў заклікаў усіх кіраўнікоў арганізацый АПК забяспечыць жорсткі кантроль за выкананнем работнікамі патрабаванняў працоўнай і вытворчай дысцыпліны ў мэтах недапушчэння выпадкаў вытворчага траўматызму і нагадаў аб строгіх мерах адказнасці за парушэнні Дырэктывы №1.