Мадэрнізацыя дала значны штуршок развіццю Аршанскага льнокамбіната
Мадэрнізацыя дала значны штуршок развіццю Аршанскага льнокамбіната. Такое меркаванне выказаў сёння журналістам, адказваючы на пытанне карэспандэнта БЕЛТА, старшыня Віцебскага аблвыканкама Аляксандр Косінец па выніках азнаямлення з ходам рэканструкцыі прадпрыемства.
На Аршанскім льнокамбінаце рэалізуецца праект Дзяржаўнай праграмы інавацыйнага развіцця Беларусі на 2010-2015 гады "Развіццё РВУТП "Аршанскі льнокамбінат" на 2010-2015 гады з улікам тэхпераўзбраення". Аб'ём інвестыцый на выкананне праекта за мінулы перыяд склаў каля Br250 млрд. "Былі абноўлены вытворчыя магутнасці прадпрыемства, што дазволіла яму выйсці на рэнтабельную працу, атрымаць нядрэнны экспарт, прыбытак", - сказаў Аляксандр Косінец, падкрэсліўшы, што галоўным вынікам гэтай працы стала павышэнне заработнай платы. "У параўнанні з 2010 годам яна павялічылася практычна ў чатыры разы. Заработная плата тут можа быць і вышэй, але многае залежыць ад саміх работнікаў прадпрыемства. Льнакамбінату трэба выпускаць не толькі тканіны, але і вырабляць уласную прадукцыю з высокай дабаўленай вартасцю, развіваць маркетынгавую дзейнасць, гандаль, збыт, павялічваць колькасць краін, у якія пастаўляецца вырабы", - дадаў губернатар.
Аляксандр Косінец падкрэсліў, што ў Віцебскай вобласці ідзе шырокамаштабная мадэрнізацыя. Значны аб'ём работ выконваецца па ўсіх напрамках: у прамысловым, аграпрамысловым сектарах, сацыяльнай сферы. "Завершана будаўніцтва прадпрыемства "Віцебскдрэў". У гэтым месяцы на ім павінна быць выпушчана першая прадукцыя. Ідзе, па сутнасці, будаўніцтва Арэхаўскага, Пастаўскага льнозаводаў. Мадэрнізаваны Дубровенскі льнозавод. У бліжэйшы час павінна адбыцца адкрыццё вытворчасці па выпуску сыроў на Пастаўскім малочным камбінаце. 7 лістапада мы адкрыем новы сырзавод у Браславе. Новыя вытворчасці з'явяцца ў Наваполацку, Мёрах. Таксама ў вобласці рэалізуюцца буйныя сацыяльныя праекты па будаўніцтве і рэканструкцыі спартыўных аб'ектаў, устаноў аховы здароўя, адукацыі. Ёсць планы па развіцці Барані", - адзначыў старшыня аблвыканкама.
Як паведамілі на ільнокамбінаце, за студзень-верасень тэмп росту аб'ёму вытворчасці прамысловай прадукцыі да аналагічнага перыяду 2012 года ў фактычных цэнах склаў 111,9%. Тэмп росту аб'ёму экспарту, па аператыўных даных, склаўся на ўзроўні 100,7%. Прадукцыйнасць працы вырасла на 14,8%. Сальда знешняга гандлю прадукцыяй склала $20 млн. Фактычны заработак па камбінаце павялічыўся на 37% і дасягнуў Br3,6 млн., у тым ліку за верасень - Br4,1 млн. (рост на 36,9%).
Рэспубліканскае ўнітарнае вытворча-гандлёвае прадпрыемства "Аршанскі ільнокамбінат" - адно з вядучых прадпрыемстваў лёгкай і тэкстыльнай прамысловасці Беларусі і СНД. Прадпрыемства ўтворана ў 1930 годзе. У цяперашні час сярэдне-спісачная колькасць работнікаў складае каля 4,5 тыс. чалавек, у тым ліку персаналу, занятага ў асноўнай дзейнасці, - амаль 4,3 тыс.
Вольга Багачова