Маладыя спартсмены Беларусі, Расіі і Эстоніі ўдзельнічаюць у турніры па боксе памяці воінаў-афганцаў у Віцебску

Віцебск прымае ХХ адкрыты рэспубліканскі турнір па боксе, прысвечаны памяці воінаў-інтэрнацыяналістаў, якія загінулі ў Афганістане. У ім удзельнічаюць каля 80 маладых спартсменаў з Беларусі, Расіі і Эстоніі.

Падчас урачыстага адкрыцця памяць загінуўшых ушанавалі хвілінай маўчання, дэлегацыя ўдзельнікаў спаборніцтваў усклала вянок да манумента «Боль».

Прывітаўшы спартсменаў, памочнік Прэзідэнта Беларусі – інспектар па Віцебскай вобласці Аляксандр Субоцін адзначыў, што адзін з самых мужных відаў спорту мае ў Віцебску слаўныя традыцыі. У ліку яркіх прадстаўнікоў нашай школы бокса – Вячаслаў Яноўскі, Андрэй Зуеў, Сяргей Ляховіч, якія праслаўлялі Беларусь на сусветных арэнах.

Генерал-маёр запасу Аляксандр Скачкоў сказаў, што спаборніцтвы выхоўваюць волю і даюць магчымасць праявіць сябе на спартыўнай ніве.

Старшыня абласной арганізацыі Беларускага саюза ветэранаў вайны ў Афганістане Валяр'ян Мацкевіч нагадаў, што турнір зараджаўся дзякуючы энтузіястам бокса Анатолю Стэльмахову і Мікалаю Анойку пры падтрымцы Андрэя Івоніна, які ўзначальваў гарадскую арганізацыю воінаў-інтэрнацыяналістаў «Братэрства». Цяпер на рынг выходзяць юнакі, якія тады яшчэ не нарадзіліся.

Пасля трох дзён баёў стануць вядомыя пераможцы турніру, вялікую дапамогу ў арганізацыі якога аказалі віцебскія прадпрыемствы-спонсары.

Пераможцы і прызёры будуць узнагароджаны медалямі, дыпломамі і прызамі ад абласной і гарадской арганізацый ветэранаў вайны ў Афганістане.