Мультыборд і камп'ютарныя праграмы па харчаванню прымяняюцца ў школах у Бешанковічах
– Гэта камп'ютарны клас і халадзільная камера для
сярэдняй школы №1 Бешанковіч, на чарзе купля мультыборда – дошкі-камп'ютара.
Такі ўжо ёсць у СШ №2. Там жа сёлета адноўлены душавыя кабіны. Для гэтых дзвюх
устаноў адукацыі набылі парты-канторкі і сучасныя парты для пачатковай школы.
Заменены настаўніцкія дошкі ва Ульскай сярэдняй школе. Замоўлены тры плазменныя
панэлі – для СШ №2, раённага Цэнтра дзяцей і моладзі і Ульскага дзіцячага сада,
надворнае абсталяванне для дашкольных устаноў райцэнтра, цацкі для ўсіх
дзіцячых садоў. Для больш якаснай арганізацыі харчавання ва ўстановах адукацыі
набыты электронныя вагі, камп'ютарная праграма «Маша». ФСК «Дзвіна» і ўстановы
адукацыі папоўніліся новымі трэнажорамі і спартыўным інвентаром, – паведаміла
начальнік аддзела адукацыі, спорту і турызму райвыканкама Святлана
Салоха.
Нямала ўвагі надаецца Бешанковіцкай раённай гімназіі-інтэрнату, якая была створана ў 2008 годзе на базе дапаможнай школы. Тут два камп'ютарныя класы: адзін выкарыстоўваецца як кабінет інфарматыкі, другі – для вывучэння англійскай і нямецкай моў.
– У 2016 годзе райвыканкам выдзеліў сродкі на набыццё ў гімназію кабінета хіміі, але так супала, што ён таксама паступае па рэспубліканскай праграме. За выдзеленыя райвыканкамам фінансы аснасцілі кабінет біялогіі, у тым ліку сучаснай мультымедыйнай прыладай і экранам, – расказала дырэктар гімназіі-інтэрната Алена Карбоўская.
Для 145 гімназістаў створаны ўсе ўмовы для атрымання
адукацыі. А ва ўтульнай сталоўцы прапануюць экспрэс-сняданак і комплексны абед для
гарадскіх дзяцей і чатырохразовае харчаванне для 17 навучэнцаў, якія пражываюць у
інтэрнаце.
Установа адукацыі ўвайшла ў абласны праект «Школа экалагічнай культуры», у гэтым напрамку працуе другі год. У 2016-м тут стварылі невялікі зімовы сад, у якім пакуль сабраны толькі тыя расліны, што вылучаюць фітанцыды, што вельмі важна ў халодную пару. Да вясны сад зменіцца.
Бібліятэцы дасталося шмат кніг у спадчыну ад былой дапаможнай школы. Фонд пастаянна папаўняецца: пастаўляюцца праграмныя творы беларускіх аўтараў, абнаўляецца навучальная літаратура, нешта набываецца за ўласныя сродкі.
– Хацелася б больш сучаснай мастацкай літаратуры для дзяцей, – адзначыла бібліятэкар Валянціна Ткачонак.
Супрацоўнікі бібліятэкі пачалі ў гімназіі рух буккросінга: чалавек, прачытаўшы кнігу, пакідае яе ў грамадскім месцы для таго, каб яе знайшоў і прачытаў іншы. Цяпер тут нямала ахвотных абмяняцца кнігамі. І на пэўным месцы ў зімовым садзе з'яўляюцца ўсё новыя і новыя выданні.
Алена Алімава. Фота Дзмітрыя ОСІПАВА.«Віцебскія весці».