Музей Обальскага камсамольскага падполля адзначае 55-годдзе з дня заснавання

Маленькія і дарослыя жыхары Шумілінскага раёна змаглі ўспомніць пра подзвіг знакамітай падпольнай арганізацыі, ушанаваць памяць ахвяр фашызму, убачыць рэліквіі, што дайшлі да нашых дзён, і паўдзельнічаць у квест-гульні на гістарычную тэматыку на мерапрыемстве «Памяць сэрца», прысвечаным 55-годдзю музея Обальскага камсамольскага падполля.

Знакамітыя на ўсю Беларусь «Юныя мсціўцы» – моладзевая арганізацыя падпольшчыкаў, якая дзейнічала на тэрыторыі цяперашняга Обальскага сельсавета ў гады Вялікай Айчыннай вайны. Юнакі і дзяўчаты вялі непрымірымую барацьбу з ворагам, знішчаючы склады харчавання, узрываючы эшалоны з боепрыпасамі, здзяйсняючы дыверсійныя аперацыі. На працягу 605 дзён існавання «мсціўцаў» фашысты не маглі напасьці на іх след, пакуль па даносе здрадніка не схапілі многіх з іх у жніўні 1943 года.

Сёння жывая памяць пра пакутніцкую смерць самай юнай удзельніцы Обальскага падполля – Зінаіды Партновой, якая вытрымала катаванні і не расказала карнікам, дзе шукаць іншых падпольшчыкаў. Пасмяротна ёй было прысвоена званне Героя Савецкага Саюза. Такога ж ганаровага звання была ўдастоена кіраўніца «Юных мсціўцаў» Яфрасіння Зенькова, а актыўных удзельнікаў арганізацыі ўзнагародзілі ордэнамі Чырвонага Сцяга і Айчыннай вайны I ступені.

У музеі Обальскага падполля захоўваюцца ўнікальныя экспанаты – асабістыя рэчы герояў, фотаздымкі, дакументы, а таксама карціны айчынных мастакоў, частка з якіх унесена ў Дзяржаўны каталог Музейнага фонду Беларусі.

Музей, які адсвяткаваў 55-годдзе, сам уяўляе сабой нямала каштоўнасць: ён размяшчаецца на тэрыторыі былога сядзібна-паркавага комплексу шляхецкага роду Грэбніцкіх. Ад былога «маёнтка» засталіся толькі руіны, але гэты помнік архітэктуры лічыцца гісторыка-культурнай каштоўнасцю і ахоўваецца дзяржавай.

Больш за 1500 экспанатаў прадстаўлена ў асноўным фондзе музея і яшчэ каля 800 адносяцца да навукова-дапаможнага. За год экспазіцыі наведваюць звыш 4,5 тыс. чалавек. Сярод вядомых ганаровых гасцей установы культуры быў і першы сакратар ЦК ВКП(б) Пётр Машэраў, які пакінуў у кнізе пажаданняў запіс у 1978 годзе.

Аднак Обальскі музей стаў не толькі месцам паломніцтва аматараў гісторыі, тут праводзяць урокі мужнасці і ўрачыстыя лінейкі для школьнікаў, дзяцей запрашаюць на цікавыя квэсты, экскурсіі не толькі ў сценах музея, але і па мясцінах баявой славы.

"Віцебскія весці".