Мы гатовыя хутка і выразна рэагаваць на любую агрэсію: у Віцебску падвялі вынікі камандна-штабных вучэнняў з органамі кіравання тэрытарыяльнай абароны
Фінальны этап камандна-штабных вучэнняў з органамі кіравання тэрытарыяльнай абароны прайшоў у Віцебску. Тут удзельнікі вучэнняў адпрацоўвалі навыкі нясення службы, аховы і абароны КПП, затрымання парушальнікаў, тушэння ўзгаранняў і іншыя дзеянні асабовага складу асобнага стралковага батальёна тэрытарыяльных войскаў у ходзе адлюстравання нападу дыверсійна-разведвальнай групы праціўніка на аб'ект, які ахоўваецца.
– Падводзячы вынік вучэнняў, можна з упэўненасцю сказаць, што тыя мэты і алгарытмы дзеянняў, якія закладваліся першапачаткова, былі адпрацаваны выразна і зладжана. Вядома, меліся невялікія шурпатасці, але для таго і патрэбны падобныя вучэнні, каб выправіць іх, і зрабіць працу падраздзяленняў яшчэ больш зладжанай, – падкрэсліў Аляксандр Субоцін. – Такія комплексныя вучэнні праводзіліся заўсёды, аднак сёння мы часцей распавядаем пра гэта ў СМІ, каб паказаць іх важнасць і прадэманстраваць усім, што мы гатовыя хутка і выразна рэагаваць на любую агрэсію.
Начальнік упраўлення тэрытарыяльнай абароны – намеснік начальніка Генеральнага штаба Узброеных Сіл Рэспублікі Беларусь Андрэй Краўчанка адзначыў, што мясцовыя выканаўчыя органы якасна справіліся з фарміраваннем падраздзяленняў тэрытарыяльных войскаў і паспяхова выканалі пастаўленыя задачы.
– Усе мясцовыя выканкамы разумеюць значнасць забеспячэння ўзаемадзеяння паміж сілавымі структурамі, што вельмі важна пры выкананні задач тэрытарыяльнай абароны. Таксама апрабавалі працэс фарміравання народнага апалчэння ў Віцебскім і Аршанскім раёнах: ад пачатку прыбыцця добраахвотнікаў да выдачы ім зброі. Сістэма тэрытарыяльнай абароны паказала дастаткова высокі вынік у плане сумеснай выканання задач, – падкрэсліў Андрэй Краўчанка. – На ўсіх аб'ектах тэрытарыяльнай абароны таксама былі апрабаваны метады барацьбы з беспілотнымі лятальнымі апаратамі: ад выкарыстання да процідзеяння БЛА, пры дапамозе сіл і сродкаў радыёэлектроннай барацьбы і зброі.
Сярод больш чым 250 чалавек, прызваных на вучэбны збор з ваеннаабавязанымі тэрытарыяльных войскаў у Віцебскай вобласці, – сяржант, камандзір аддзялення Сяргей Смоленскі. Раней ён служыў у пагранічных войсках. Спачатку паўгода ў «вучэбцы» ў Смаргоні, а пасля – у Мінску ў камендатуры забеспячэння. Цяпер працуе абвальшчыкам мяса.
– Прыйшло смс-апавяшчэнне на тэлефон, дзе было напісана прыбыць у ваенкамат у вызначаныя дату і час. Прыйшоў, запоўніў анкету і мне выдалі позву на 10 верасня. Падумаў, што раз Радзіма кліча, трэба ісці, – расказаў Сяргей Смаленскі. – Гэта мае першыя зборы. Мне спадабалася адпрацоўваць мноства тактычных задач на вучэннях. Даведаліся шмат новага, бо час не стаіць на месцы, з'явіліся новая тэхніка і ўзбраенне. Мы ўсе здружыліся і сталі як браты, нават з'язджаць не хочацца.