На гэтым тыдні ў Беларусі даражэе тэлефонная сувязь

У Беларусі павялічваюцца тарыфы на паслугі электрасувязі агульнага карыстання для фізічных асоб, юрыдычных асоб і індывідуальных прадпрымальнікаў.

Такое рашэнне змяшчаецца ў пастанове Мінэканомікі ад 31 сакавіка 2015 года №27 "Аб унясенні змяненняў у пастанову Міністэрства эканомікі Рэспублікі Беларусь ад 10 лістапада 2011 года №184", апублікаванай 4 сакавіка на Нацыянальным прававым партале, паведамляе БЕЛТА.

Для насельніцтва месячная абанаплата за ўключаны ў асобную абаненцкую лінію тэлефон, пераведзены на паслуговую сістэму разлікаў за размовы, павялічыцца да 21 тыс. рублёў (у маі мінулага года абанаплата была ўстаноўлена ў памеры 12, 25 тыс. рублёў).

За кожную поўную або няпоўную хвіліну злучэння грамадзянам трэба будзе заплаціць 51 рубель (у маі - 29,8 рубля). Поўная або няпоўная хвіліна размоў па міжгародняй сувязі без дапамогі тэлефаніста абыдзецца карыстальнікам у 100 рублёў (у маі - 72,6 рубля).

Павышэнне гранічных тарыфаў закране таксама юрыдычных асоб і індывідуальных прадпрымальнікаў. Напрыклад, абанаплата за асноўны тэлефон, пераведзены на паслуговую сістэму разлікаў за размовы, вырасце да 24, 5 тыс. рублёў (у маі было 15, 5 тыс. рублёў). Абанаплата за асноўны тэлефон у арганізацыях сацыяльнай сферы, якія фінансуюцца з бюджэту, павялічыцца да 12 тыс. рублёў (у маі – 7, 65 тыс. рублёў). Абанаплата за асноўны тэлефон, уключаны ва ўстановачна-вытворчую АТС у якасці злучальнай лініі, вырасце да 55,3 тыс. рублёў (у маі - 35 тыс. рублёў).

Пастанова ўступае ў сілу праз пяць дзён пасля яе афіцыйнага апублікавання.