Лагістычным комплексам «Брэміна-Орша» зацікавіліся інвестары з заходнееўрапейскіх, блізкаўсходніх і азіяцкіх краін

У наступным годзе на пляцоўцы мультымадальнага прамыслова-лагістычнага комплексу «Брэміна-Орша» ў пасёлку Балбасава Аршанскага раёна плануецца завяршыць асноўныя работы першага пускавога комплексу, які мяркуецца ўвесці ў эксплуатацыю ў 2018 годзе. Ужо сёння да праекта праяўляюць прадметны інтарэс інвестары з шэрагу заходнееўрапейскіх, блізкаўсходніх і азіяцкіх дзяржаў.

Маштабны праект, прызваны істотна пашырыць лагістычныя магчымасці Беларусі, рэалізуе ТАА «Брэміна груп» пры дзяржаўнай падтрымцы, прадугледжанай Указам Прэзідэнта №334 ад 21.07.2015. Па словах кіраўніка праекта Васіля Дземянцея, сёння завяршаецца будаўніцтва пад'язной аўтадарогі і пачынаецца пракладка сетак і камунікацый, неабходных для функцыянавання комплексу ў цэлым. Акрамя гэтых работ, у 2017 годзе плануецца пабудаваць адміністрацыйны корпус агульнай плошчай 2,8 тыс. кв. м, складскія памяшканні (10,4 тыс. кв. м), а таксама стаянку для велікагрузных аўтамабіляў на 200 месцаў.

– Усё гэта прадугледжваецца першай стадыяй рэалізацыі праекта, якую мы маем намер завяршыць у пачатку 2018-га, пасля чаго будзем рухацца далей, – растлумачыў ён.

На завяршальным этапе (2021-2023 гады) трэба будзе ў асноўным ствараць збудаванні і інфраструктуру для арганізацыі прамысловых вытворчасцей. Агульны кошт праекта ацэньваецца прыкладна ў 226 млн долараў. Фінансаванне мяркуецца весці за кошт уласных сродкаў кампаніі, а таксама прыцягнення банкаўскіх крэдытаў і рэсурсаў інвестараў.

Паралельна з арганізацыяй будаўнічых работ «Брэміна груп» вядзе актыўнае маркетынгавае прасоўванне комплексу. На нядаўнім інавацыйным форуме ў Віцебску кіраўнікі праекта правялі перамовы з прадстаўнікамі лагістычнай кампаніі, якая працуе ў Клайпедскім порце. Прапановы аб супрацоўніцтве зацікавілі інвестараў з Кітая, Германіі, Польшчы. Прадстаўнікі Аб'яднаных Арабскіх Эміратаў прапрацоўваюць магчымасці ўдзелу ў праекце.

Патэнцыйнымі рэзідэнтамі МПЛК

“Брэміна-Орша” з'яўляюцца транспартна-экспедыцыйныя кампаніі, паштовыя аператары і службы экспрэс-дастаўкі, вытворчыя прадпрыемствы рознай галіновай накіраванасці. 

Падобны інтарэс, вядома, не выпадковы. У першую чаргу ён звязаны з унікальным месцазнаходжаннем комплексу. Участак на перасячэнні двух еўрапейскіх транспартных калідораў прадастаўляе доступ да усіх асноўных відаў перамяшчэння грузаў (аўтадарогі, чыгуначная сетка, авіязносіны) з дастатковай прапускной здольнасцю для абслугоўвання перавозак. 

Варта адзначыць, што праект у Оршы для нацыянальнага лагістычнага аператара ТАА «Брэміна груп» з'яўляецца найважнейшым, але не адзіным. Кампанія стварае лагістычную інфраструктуру непасрэдна на мяжы з Еўрасаюзам. У снежні плануецца адкрыццё транспартна-лагістычнага комплексу «Брэміна-Брузгі» у Гродзенскай вобласці (пагранпераход Брузгі-Кузніца). У яго склад уваходзяць зона мытнага кантролю з грузавой стаянкой на 250 месцаў, складскі комплекс плошчай 10 тыс. кв. м, а таксама дзелавы цэнтр з пунктам мытнага афармлення, гасцініцай і іншымі сэрвіснымі аб'ектамі.

Па словах Васіля Дземянцея, аналагічны праект прадугледжваецца рэалізаваць на працягу года на беларуска-польскай мяжы у населеным пункце Бераставіца Гродзенскай вобласці (пагранпераход Бераставіца-Баброўнікі).

Сяргей Антонаў, «Віцебскія весці». Фота з адкрытых крыніц.