На абласных «Дажынках» у Гарадку падсумавалі рэкорды ўборачнай 2014 года
У гэтым годзе ўклад Віцебшчыны ў агульны каравай аказаўся рэкордным. Рэкордным, напэўна, была і колькасць караваяў у мінулую суботу ў Гарадку, дзе праходзілі абласныя «Дажынкі». Яны прысутнічалі практычна ва ўсіх кропках грамадскага харчавання, на гандлёвых прылаўках раённых падворкаў і нават на медыяфоруме: журналісты сродкаў масавай інфармацыі вобласці шчыра частавалі сваіх падпісчыкаў і адзін аднаго свежай выпечкай.
Пры ўездзе ў райцэнтр усіх прывітавала архітэктурная кампазіцыя – працаўніца вёскі з хлебам-соллю. Тут жа дзяўчаты ў нацыянальных касцюмах з караваем з мукі сёлетняга ўраджаю сустракалі старшыню аблвыканкама Аляксандра Косінца. Выслухаўшы даклад старшыні раёна Васіля Муранкова аб праведзенай працы па падрыхтоўцы да свята, Аляксандр Мікалаевіч наведаў шэраг аб'ектаў. Ён пабываў у Гарадоцкім дзяржаўным прафесійна-тэхнічным каледжы сельскагаспадарчай вытворчасці імя І.В. Дарашчанкі, дзе была арганізавана выстава інавацыйных распрацовак устаноў адукацыі вобласці: сельгастэхніка, прылады і агрэгаты, якія ў значнай ступені палягчаюць працу на мехдварах, а таксама інвестпраекты, якія тычацца аграэкатурызму, метадычныя дапаможнікі. Старшыня аблвыканкама адзначыў, што многія з прадстаўленых узораў варта ўзяць на ўзбраенне, а маладых аўтараў заахвоціць за інтэлектуальную працу.
Наступным пунктам маршруту стаў абноўлены гарадскі Палац культуры, у фае якога размясцілася экспазіцыя вырабаў народных майстроў. Па словах Аляксандра Косінца, такая прадукцыя павінна рэалізоўвацца ў спецыялізаваных крамах, у тым ліку і ў аб'ектах прыдарожнага сэрвісу. Унікальныя сувеніры, якія нясуць у сабе нацыянальны каларыт, стануць выдатным падарункам на памяць аб наведванні Гарадоччыны.
Кіраўнік вобласці таксама ўбачыў, у якіх умовах жывуць спартсмены ў новым гасцінічным комплексе на 75 месцаў Віцебскага абласнога цэнтра алімпійскага рэзерву па зімовых відах спорту.
– Да Новага года неабходна здаць басейн, цір, трэнажорную залу для зімовых відаў спорту з трэнажорамі для класічнага і канькабежнага бегу, гарналыжнага спуску, – устанавіў тэрміны Аляксандр Косінец. – А да вясны трэба пабудаваць недарагую лядовую арэну на 800 месцаў коштам 2-2,5 млн долараў.
Але, мабыць, самай знакавай і доўгачаканай падзеяй, якой з нецярпеннем чакалі не толькі на Віцебшчыне, але і ва ўсёй рэспубліцы, стала адкрыццё лыжаролернай трасы ва ўрочышчы Вераб'іныя горы. Аляксандр Косінец перарэзаў чырвоную стужку і ўзяў абяцанне з юных спартсменаў, якія прысутнічалі на ўрачыстым мерапрыемстве, прыкласці максімум намаганняў на шляху да алімпійскіх вяршынь.
– Вышэй, мацней, хутчэй! Віцебшчына чакае ад вас вынікаў, чакае перамог! – напуціў ён будучых чэмпіёнаў.
Далей кіраўнік вобласці і журналісты здзейснілі экскурсію па лыжаролернай трасе, даўжыня якой складае крыху больш за 5 км, а шырыня 7 м. Нягледзячы на тое, што дадзены шматфункцыянальны спартыўны аб'ект пабудаваны ў сціслыя тэрміны, тут выкананы ўсе міжнародныя стандарты, узведзены агароджы ад незваных лясных насельнікаў, ахоўная сцяна (падзяляючая серпанцін ад стрэльбішча). Канфігурацыя трасы дазваляе складаць самыя розныя дыстанцыі. Па камплектацыі і значнасці гэта другі пасля Раўбічаў такі аб'ект у Беларусі. Тут можна праводзіць спаборніцтвы любога ўзроўню, у тым ліку чэмпіянаты Еўропы і свету. Дарэчы, у лістападзе сюды прыедуць спецыялісты міжнароднай групы, каб правесці неабходныя працэдуры па пытанні ліцэнзавання.
Заключнай кропкай маршруту губернатара стала галоўная сцэна «Дажынак», дзе ў гэты дзень гучалі самыя цёплыя і шчырыя словы падзякі на адрас працаўнікоў вёскі. У сваёй прывітальнай прамове Аляксандр Косінец адзначыў, што развіццё аграпрамысловага комплексу вобласці набыло паступальны і дынамічны характар, забяспечаны ўстойлівыя тэмпы росту аб'ёмаў вытворчасці сельскагаспадарчай прадукцыі.
– У бягучым годзе сабрана 1 млн 302 тыс. т збожжа ва ўсіх катэгорыях гаспадарак, фактычна ў амбарнай вазе. Такі вагу Віцебшчына ніколі не атрымлівала за сваю гісторыю, – падкрэсліў Аляксандр Мікалаевіч. – У няпростых умовах паўночнага краю мы змаглі дасягнуць высокіх вынікаў. Гэта сведчыць аб зладжанай, арганізаванай працы, якую сёння праводзяць жыхары вобласці.
Старшыня аблвыканкама таксама падрабязна спыніўся на тых маштабных пераўтварэннях, якія адбыліся ў Гарадку. Ён выказаў велізарную падзяку ўсім, хто ў гэтым удзельнічаў – будаўнічым арганізацыям, лясным гаспадаркам, меліяратарам, энергетыкам, прамысловым прадпрыемствам, моладзі і хросным. Усяго пабудавана, рэканструявана, адрамантавана 167 аб'ектаў, на гэтыя мэты затрачана звыш 700 млрд рублёў, з якіх 500 млрд – бюджэтныя сродкі.
– Самае каштоўнае, што ў нас ёсць – гэта людзі, – рэзюмаваў Аляксандр Косінец. – Іх трэба берагчы, паважаць, цаніць. Дзяржава і надалей будзе рабіць усё неабходнае для развіцця вёскі. Дзякуй вам, дарагія сябры, за ўдарную працу. Дабра і шчасця! А каравай, які мне ўручалі сёння, у 2015 годзе будзе яшчэ больш. З святам!
Далей наступіў час герояў сёлетняй агітацыйнай кампаніі, якія купаліся не толькі ў прамянях славы, але і ў прамянях сонца: імжа спынілася, неба перастала хмурыцца. Такім чынам сама прырода выказала ім павагу за самаадданую працу.
Алена Сыс, "Віцебскія весці"