На Вялікдзень віцебскія праваахоўнікі ўзмоцняць меры бяспекі

Пакуль жыхары абласнога цэнтра набываюць велікодныя пачастункі, праваахоўнікі прымаюць неабходныя меры па ахове грамадскага парадку падчас свята.

Так, у Віцебску 12 красавіка будзе павялічана колькасць міліцэйскіх нарадаў. Гэта звязана са святкаваннем Вялікадня, які адзначаюць праваслаўныя хрысціяне. Святочныя набажэнствы пройдуць у гэтыя дні ў праваслаўных храмах і прыходах абласнога цэнтра і збяруць вялікую колькасць людзей.

Як паведамляе сайт УУС Віцебскага аблвыканкама, у сувязі з гэтым міліцыянеры пастараюцца забяспечыць бяспеку людзей і захаванасць іх маёмасці. Таксама іх намаганні будуць накіраваны на папярэджанне ДТЗ у месцах правядзення святочных мерапрыемстваў і на прылеглых вуліцах.

З улікам павелічэння пасажырскага патоку ў выхадныя і святочныя дні будзе актывізавана дзейнасць Дзяржаўтаінспекцыі. Распрацаваны маршруты аб'ездаў месцаў правядзення мерапрыемстваў, ва ўзаемадзеянні з камунальнымі службамі прымаюцца меры да забеспячэння камфортных умоў паркоўкі транспартных сродкаў грамадзян.

Месцы правядзення мерапрыемстваў загадзя агледзяць спецыялісты сапёрна-піратэхнічных груп. Пры неабходнасці ў дзень рэлігійнага свята будуць арганізаваны даглядныя мерапрыемствы.

УУС Віцебскага аблвыканкама таксама нагадвае, што на масавыя мерапрыемствы не будуць дапускацца грамадзяне ў нецвярозым стане, якія маюць пры сабе калючыя і рэжучыя прадметы, грувасткія рэчы, алкагольныя напоі.

Партал ПРОВІЦЕБСК