На планерцы ў старшыні аблвыканкама: Рэалізуючы эканамічныя планы, не забывацца пра людзей

Найстражэйшы попыт за вынікі гаспадарчай дзейнасці чакае рэгіёны ў 2016 годзе. Да гэтага трэба быць гатовымі і адпаведна выбудоўваць працу ўсіх галін народнагаспадарачага комплексу вобласці.

Такію задачу паставіў перад сваімі намеснікамі, старшынямі камітэтаў эканомікі, сельскай гаспадаркі і харчавання аблвыканкама, кіраўніцтвам віцебскага канцэрна ”Мяса-малочныя прадукты“ старшыня аблвыканкама Мікалай Шарснёў, вярнуўшыся з нарады ў Кіраўніка дзяржавы па разглядзе праекта прагнозу сацыяльна-эканамічнага развіцця Беларусі на будучы год.

Калі коратка, сутнасць надыходзячых новаўвядзенняў у тым, што выканаўчай вертыкалі на месцах дэлегуюцца рэальныя ўладныя паўнамоцтвы для максімальна эфектыўнага выкарыстання наяўнай матэрыяльнай базы. Такім чынам, чым хутчэй мы акумулюем у вобласці ўласныя магчымасці, тым раней адчуем паляпшэнне ў эканоміцы.

У Віцебшчыны ёсць істотная фора: мы першымі ў краіне прыступілі да стварэння аграпрамысловых холдынгаў, і фактычна атрымалі адабрэнне на самым высокім узроўні.

Старшыня аблвыканкама асабліва падкрэсліў, што прэзідэнт запатрабаваў давядзення ўсім эканамічным суб'ектам паказчыкаў, якія будуць вызначаць эфектыўнасць іх дзейнасці. Пры гэтым па-ранейшаму актуальным застаецца паказчык ВРП, які характарызуе аб'ём вырабленага ўнутранага рэгіянальнага прадукту.

Попыт за іх забеспячэнне на ўзроўні абласцей – па выніках кожнага квартала, справаздачы перад кіраўніцтвам краіны – па выніках паўгоддзя, попыт – з улікам патрабаванняў Дэкрэта №5 ”Аб узмоцненні патрабаванняў да кіраўнічых кадраў і работнікаў арганізацый“. Гэта значыць не справіўся – вызвалены ад займанай пасады без права на заняцце кіраўнічых пастоў у далейшым.

Для Віцебшчыны падобны падыход у частцы паказчыкаў не з'яўляецца навінкай, ён практыкаваўся пры абароне праектаў прагнозу сацыяльна-эканамічнага развіцця рэгіёнаў на 2016 год. Мікалай Шарснёў яшчэ раз акцэнтаваў увагу на неабходнасці давядзення спецыфічных паказчыкаў да сельскагаспадарчых прадпрыемстваў – па захаванасці цялят, колькасці пагалоўя буйной рагатай жывёлы, паставіўшы ў залежнасць ад іх выканання заработную плату ўсіх, ад рабочага да кіраўніка.

Старшыня аблвыканкама нагадаў прысутным, што сярод прыярытэтаў эканомікі на наступны год Кіраўнік дзяржавы абазначыў рост экспарту, умацаванне пазіцый айчынных вытворцаў на ўнутраным рынку, укараненне новых тэхналогій, зніжэнне сабекошту прадукцыі.

Каб наш тавар быў запатрабаваны на замежных рынках, зніжэнне сабекошту прадукцыі, лічыць Мікалай Шарснёў, вобласць павінна забяспечыць на 20-25%. Працаваць над гэтай праблемай варта больш глыбока. Адзін са шляхоў бачыцца ў выкарыстанні айчыннай сыравіны прадпрыемствамі харчовай і лёгкай прамысловасці, такімі, як КУП ”Віцебскі кандытарскі камбінат ”Віцьба“, ААТ ”Сцяг індустрыялізацыі“ і іншыя.

А вось зніжэнне сабекошту за кошт скарачэння работнікаў катэгарычна непрымальна. Аптымізацыя неабходна, але паралельна павінны стварацца новыя працоўныя месцы. У сувязі з гэтым намесніку старшыні аблвыканкама Алегу Мацкевічу даручана дэталёва прааналізаваць усе інвестпраекты, заяўленыя да рэалізацыі на тэрыторыі вобласці, і актывізаваць працу па іх завяршэнні, аказаўшы неабходную дапамогу ў вырашэнні наяўных пытанняў.

Дарэчы, у сувязі з чаканым рашэннем аб далейшым лёсе Гарадоцкага райаграпрамсНаба кіраўнік вобласці завастрыў увагу на тым, што змена ўласніка не пацягне за сабой скарачэнне радавых работнікаў прадпрыемства.

Заработная плата пры ўсіх наяўных праблемах павінна фарміравацца пад вытворчасць і рэалізацыю прадукцыі і выплачвацца людзям штомесяц, запатрабаваў Мікалай Шарснёў. Практыку, калі кіраўнікі атрымліваюць зарплату, а яе выплата працоўнаму калектыву затрымліваецца, неабходна выключыць.

Аптымізацыя выдаткаў – яшчэ адна жыццёвая задача, якую трэба вырашаць неадкладна па ўсіх напрамках. Адзін з іх – жыллёва-камунальная гаспадарка, якая ў масавай свядомасці трывала асацыюецца з "чорнай дзіркай", у якую ляцяць немалыя грошы з бюджэту і асабістых кашалькоў грамадзян.

Істотнае зніжэнне затрат у сферы ЖКГ у асенне-зімовы перыяд дае перавод на мясцовыя віды паліва. Як далажыў начальнік упраўлення жыллёва-камунальнай гаспадаркі аблвыканкама Юрый Дзядзела, да 10 градусаў марозу ў вобласці на дровах, шчапе і пелетах працуюць 68% кацельняў - практычна ва ўсіх райцэнтрах, за выключэннем асобных аб'ектаў.

Старшыня аблвыканкама даручыў прапрацаваць пытанне аб пераводзе на мясцовыя віды паліва кацельняў аграгарадкоў і цяплічных гаспадарак, а таксама па пераходзе на самаакупнасць спартыўных залаў і стадыёнаў, аднаўленні працы камбінатаў бытавога абслугоўвання, вызначыцца з далейшай перспектывай хранічна неплацежаздольных і стратных прадпрыемстваў.

У завяршэнне абмеркавання Мікалай Шарснёў яшчэ раз нагадаў, што ўсе эканамічныя планы і прагнозы неабходна рэалізоўваць, зыходзячы ў першую чаргу з інтарэсаў людзей: ім трэба даць працу, спытаць за якасць яе выканання і заплаціць за яе.

Людміла Мышлёнак,
галоўны спецыяліст галоўнага ўпраўлення
ідэалагічнай работы, культуры
і па справах моладзі аблвыканкама.