На пажары ў Воршы загінулі маладая жанчына і дзьве маленькія дзяўчынкі
Загінулым дзяўчынкам было 6 і 7 гадоў. Паведамленне аб пажары ў кватэры жылога дома па вуліцы Магілёўскай у Воршы паступіла на пульт дзяжурнага МНС позна ўвечары 11 красавіка.
Выратавальнікі выехалі адразу ж, але выратаваць 28-гадовую жанчыну, якая знаходзілася ў кватэры, і дзвюх дзяўчынак - 7- і 6 гадоў, ім ужо не ўдалося. Таксама агнём знішчана мэбля. Кватэра, у якой адбыўся пажар, належала непрацуючаму 57-гадоваму жыхару Воршы, бацьку загінулай жанчыны.
Прычына пажару ўстанаўліваецца.
Як пазней распавялі ў Следчым камітэце, загінулая жанчына прыходзілася маці адной і цёцяй другой дзяўчынцы.
Следчыя высветлілі, што ўвечары 11 красавіка ў вышэйуказанай кватэры знаходзіўся 57-гадовы мужчына, яго 28-гадовая дачка і дзве малалетнія ўнучкі. Каля 22 гадзін усё сям'я легла спаць. Мужчына знаходзіўся ў адным пакоі, яго дачка і дзве ўнучкі – у іншым. Праз некаторы час мужчына прачнуўся ад таго, што пачуў трэск. Адкрыўшы дзверы свайго пакоя, ён убачыў, што кватэра моцна задымлена. Мужчына зразумеў, што ў кватэры пажар і пачаў клікаць дачку і ўнучак. Не атрымаўшы адказу на свае крыкі, падумаў, што дачка і ўнучкі паспелі выбегчы з кватэры, і сам паспяшаўся выйсці з задымленага памяшкання. Пасля да кватэры прыбылі пажарныя разлікі, у момант тушэння пажару пажарныя вынеслі з кватэры целы маладой жанчыны і дзвюх малалетніх дзяўчынак. Мужчына зразумеў, што дачка і ўнучкі не паспелі выйсці з кватэры да яго.
Устаноўлена, што ачаг узгарання знаходзіўся на кухні. Экспертамі зроблены папярэднія высновы, што смерць усіх траіх наступіла ў выніку атручвання вокісам вугляроду.
Праверка па дадзеным факце працягваецца. Праводзіцца комплекс мерапрыемстваў, накіраваных на высвятленне ўсіх абставін здарэння, усталяванне прычыны ўзгарання. Якіх-небудзь прыкмет, што ўказваюць на крымінальны характар смерці, не выяўлена. Для канчатковых заключэнняў і высноў следчымі прызначаны судова-медыцынскія, пажарна-тэхнічныя, а таксама іншыя крыміналістычныя, спецыяльныя і тэхнічныя экспертызы.
Следчы камітэт і Міністэрства па надзвычайных сітуацыях канстатуюць, што гэта чацвёрты з пачатку года пажар, на якім загінулі дзеці. 29 студзеня ў вёсцы Весялова Навагрудскага раёна з палаючага дома не змаглі выбрацца 33-гадовая мама і яе 9-гадовы сын; 8 сакавіка ў вёсцы Нацкава Мастоўскага раёна ў палаючым доме загінулі дзве малалетнія дзяўчынкі 7 і 6 гадоў, і 4-гадовы хлопчык; 31 сакавіка ў Шклове пры пажары загінулі 2-гадовае дзіця, яго дзядуля і прадзед.