На пажары ў віцебскім інтэрнаце выратавалі пяць чалавек

Паведамленне аб пажары ў інтэрнаце па вуліцы Лаза, які належыць ААТ «Візас», паступіла ў службу МНС ад вахцёра напярэдадні ў 23:00.

Агонь успыхнуў у адным з пакояў на трэцім паверсе шматпавярховіка. Пажар стаў прычынай моцнага задымлення лесвічных клетак. Ратавальнікі, якія прыбылі, вывелі з задымленага пакоя пенсіянерак. Да прыбыцця «хуткай» пажарныя правялі рэанімацыйныя мерапрыемствы. Пасля агляду медыкамі жанчын даставілі ў Віцебскую абласную клінічную бальніцу з дыягназам «атручэнне прадуктамі гарэння, апёк верхніх дыхальных шляхоў».

Ратаваць давялося і суседку з двума маленькімі дзецьмі, настолькі моцным аказалася задымленне. У выніку пажару яны не пацярпелі і ад шпіталізацыі адмовіліся.

З-за моцнага задымлення і пагрозы здароўю жыльцоў работнікі МНС сумесна з адміністрацыяй інтэрната эвакуіравалі яшчэ 33 чалавекі.

У пакоі, дзе адбыўся пажар, таксама знаходзіўся 33-гадовы унук, які пакінуў пакой самастойна да прыбыцця падраздзяленняў МНС. Аднак пазней мужчына звярнуўся ў абласную бальніцу са скаргамі на дрэннае самаадчуванне і пасля агляду быў шпіталізаваны з папярэднім дыягназам «атручэнне прадуктамі гарэння».

Мяркуецца, што ўзгаранне ў пакоі інтэрната адбылося ад кароткага замыкання электрасеткі. У выніку пажару пашкоджана маёмасць, задымлены сцены.