На Віцебшчыне выпякаюць хлебабулачныя вырабы з мукі ўраджаю-2015
Ад зярнятка да прылаўка. Жыхары паўночнага рэгіёна краіны ўжо з задавальненнем спажываюць хлебабулачныя вырабы з мукі ўраджаю-2015. Адразу пасля завяршэння ўборачнай з-за спецыфікі вытворчасці гэта было проста немагчыма. Цяпер жа мукамолы і хлебапёкі прыйшлі на змену камбайнерам. Яны актыўна ўключыліся ў працу па перапрацоўцы ўраджаю, які ў Віцебскай вобласці ў 2015 годзе пабіў усе рэкорды.
Хлеб на стол – і стол пасад. Хлеба ні кавалка – і стол дошка. Такога прынцыпу Таццяна Русцікава прытрымліваецца ўжо 30 гадоў.
Таццяна Русцікава, кантралёр гатовай прадукцыі Віцебскага хлебазавода:
Атрымліваючы муку са свежага ўраджаю, мы пачынаем працаваць як у першы раз. І мы стараемся, укладваем усю душу, каб атрымаць такія якасныя батоны.
Вось яны – найсвяжэйшыя батоны. Гарачыя, духмяныя. Шкада, што камера не перадае гэты пах. Цяпер мы іх складваем, і зусім хутка, літаральна праз пару гадзін, яны ўжо з'явяцца на прылаўках крам.
Як толькі паступае заказ, так адразу духмяныя вырабы адпраўляюцца ў гандлёвыя кропкі. Мяркуючы па ўсім, людзям сапраўды не цярпіцца паспрабаваць свежага хлебушка 2015 года.
Пшанічную муку на Віцебскі хлебазавод пастаўляюць крыху больш за тыдзень. З яе і робяць першыя тарты, сушкі, батоны і булачкі. А вось з жытняй (яна ідзе на чорны хлеб) на камбінаце хлебапрадуктаў толькі пачынаюць працаваць. І справа зусім не ў марудлівасці – тэхналогіі не дазвалялі раней заняцца перапрацоўкай жытнёвых каласкоў.
Марыя Раловіч, намеснік дырэктара па вытворчасці Віцебскага камбіната хлебапрадуктаў:
Збожжа праходзіць некалькі стадый выспявання. З поля мы яго прывозім, безумоўна, ужо спелае. Але кожны аграном выдатна ведае, што збожжа ўсё роўна павінна яшчэ паляжаць у засеках, у амбарах і даспець. Вось гэта і называецца даспяванне збожжа. Дзесьці перыяд гэты доўжыцца месяц-два. Усё залежыць ад якасці збожжа. І толькі пасля гэтага пачынаем яго выкарыстоўваць.
Вольга Паўлючэнка, галоўны тэхнолаг віцебскага хлебазавода:
Мука, калі яна свежазмолатая, і трэба атрымаць з яе прадукт, то атрымліваецца ліпкі мякіш, расплывістая форма. Таму заўсёды пры атрыманні збожжа, і нават не заўсёды са свежага памолу, абавязкова, калі атрымліваем муку, мы павінны яе сем дзён вытрымаць у нас на прадпрыемстве.
Дарэчы, засекі аграрыі паўночнага рэгіёна краіны ў 2015 годзе запоўнілі як ніколі.
Упершыню за 30 гадоў у Віцебскай вобласці сабралі больш за 1 мільён 400 тысяч тон збожжа.