На Віцебскай ГЭС прайшлі маштабныя вучэнні па ліквідацыі НС

Маштабныя тактыка-спецыяльныя вучэнні па ліквідацыі надзвычайнай сітуацыі прайшлі сёння на Віцебскай ГЭС у рамках акцыі «Адзіны дзень бяспекі».

Згодна з легендай, пры працы гідрагенератара адбылося кароткае замыканне з наступным узгараннем, якое выклікала моцнае задымленне ў цэху. Пры спробе самастойна патушыць пажар атрымалі траўмы рознай ступені цяжкасці два работнікі, якія знаходзіліся на ніжнім узроўні падстанцыі. Акрамя таго, выйшла з ладу ахоўная аўтаматыка, і адбылося кароткае замыканне на трансфарматары, які загарэўся ад выкінутага масла.

Далей па сцэнарыі адбылася яшчэ адна надзвычайная сітуацыя. Пакуль у ручным рэжыме запускалі дызель-генератар, на што сышло 15 хвілін, падняўся ўзровень ракі, і перакулілася лодка. У вадзе апынуліся два рыбакі, якія мелі патрэбу ў дапамозе.

Вучэнні, як растлумачыў начальнік абласнога ўпраўлення МНС Сяргей Мелешкін, накіраваны на ўзаемадзеянне арганізацый і ўстаноў рэгіёна пры ліквідацыі надзвычайных сітуацый, інфармацыйнае асветніцтва грамадзян. У ліквідацыі надзвычайнай сітуацыі і выратаванні людзей удзельнічалі падраздзяленні МНС, спецыялісты «Віцебскэнерга», АСВОД, работнікі хуткай медыцынскай дапамогі, работнікі прадпрыемства.

"Віцебскія весці".