На пасяджэнні Віцебскага аблвыканкама разгледзелі пытанне «Аб дадатковых мерах па кадравым забеспячэнні дзяржаўных арганізацый»
У пасяджэнні аблвыканкама прыняў удзел кіраўнік Адміністрацыі Прэзідэнта Рэспублікі Беларусь Ігар Сергеенка.
– Па даручэнні кіраўніка дзяржавы сумесна з Адміністрацыяй Прэзідэнта і іншымі органамі завяршаецца распрацоўка абноўленай канцэпцыі дзяржаўнай кадравай палітыкі, – падкрэсліў ён. – Прайшло ўжо больш за 20 гадоў, з'явіліся новыя тэндэнцыі і фактары, змяніліся падыходы. Сёння бачым шэраг праблем у гэтым пытанні: скарачэнне кадравых рэсурсаў з-за аб'ектыўных прычын, такіх як старэнне насельніцтва, выезд грамадзян у іншыя рэгіёны і за межы краіны, змяненне падыходаў у аказанні кадраў на вёсцы – асабліва востра гэта адчуваем. З'явіліся праблемы ў розных галінах – у будаўніцтве, прамысловасці, замацаванні кадраў з вышэйшай адукацыяй, гэтае пытанне характэрна для ўсіх рэгіёнаў, і Віцебская вобласць тут не выключэнне. Асобныя негатыўныя тэндэнцыі праглядаюцца, можа быць, больш рэльефна ў Віцебскай вобласці. Але якая б ні была канцэпцыя, у любым выпадку гэта – стратэгічны дакумент, які вызначае асноўныя напрамкі дзяржаўнай кадравай палітыкі, пытанні размеркавання працоўных рэсурсаў у галіновым і рэгіянальным разрэзах, працы з маладымі кадрамі. У цэлым падбор, расстаноўка, выхаванне кадраў залежаць ад кожнага канкрэтнага кіраўніка то прадпрыемства, то рэгіёна з улікам таго, што ў нашай краіне рэалізуюцца ўсе сацыяльныя праграмы, накіраваныя на падтрымку маладых спецыялістаў і іншых слаёў насельніцтва. Пракантраляваць і адкарэкціраваць задачы па вырашэнні кадравага пытання – у гэтым і заключаецца мэта дадзенага мерапрыемства.
Адкрываючы пасяджэнне, старшыня аблвыканкама Аляксандр Субоцін падкрэсліў, што эканоміка вобласці працуе ва ўмовах беспрэцэдэнтных санкцый, калі парушаны ўсе лагістычныя ланцужкі. У такіх умовах асабліва востра стаіць кадравае пытанне.
– Важны кожны чалавек, які працуе ў тым ці іншым калектыве. Гэта датычыцца ўсіх галін, у тым ліку прамысловасці, сістэмы адукацыі, аховы здароўя і іншых, – адзначыў кіраўнік вобласці. – Мэта дзяржаўнай кадравай палітыкі заключаецца не толькі ў фарміраванні, але і захаванні працоўных рэсурсаў. Да кадраў павінна быць уважлівае стаўленне: з аднаго боку, беражлівае, з другога, жорсткае і патрабавальнае, каб чалавек адчуваў сваю адказнасць і проста так не мог пакінуць сваё працоўнае месца.
На Віцебшчыне забяспечанасць асноўных галін народнай гаспадаркі складае 96,4 %. Нягледзячы на гэта, кадравы голад, калі можна так выказацца, адчуваецца. Асноўны заяўнік – прамысловая галіна, тут недахоп працоўных рэсурсаў складае амаль 3 тыс., у сельскай гаспадарцы – 2,5 тыс., больш за тысячу – у транспартнай, будаўнічай сферах, ЖКГ, ахове здароўя, падкрэсліў у дакладзе старшыня камітэта па працы, занятасці і сацыяльнай абароне аблвыканкама Барыс Ефрэмаў.
Што зроблена, каб задаволіць кадравы голад? У першую чаргу, уцягваецца ў працоўную дзейнасць эканамічна незанятае насельніцтва, для гэтага ў раёнах створаны 26 камісій. Па-другое, падрыхтоўка і перападрыхтоўка тых кадраў, якія страцілі сваю прывабнасць на дзеючым рынку. У арганізацыях і на прадпрыемствах імкнуцца палепшыць сацыяльны пакет. Яшчэ адно напрамак – стварэнне профільных класаў, дзе са школьнай парты рыхтуюцца кадры, якія атрымліваюць мэтавае размеркаванне. Аблвыканкам пайшоў і на такія меры, як кантроль і абмежаванне скасавання датэрміновых працоўных дагавораў на малых і буйных прадпрыемствах.
Ніжэй сярэднеабласнога паказчыка па забеспячэнні кадрамі ідуць 11 раёнаў вобласці. Лепшая абстаноўка ў Віцебску, Лепельскім, Глыбоцкім, Лёзненскім, Сенненскім раёнах.
Колькасць занятых у эканоміцы вобласці на сёння складае амаль 460 тысяч работнікаў, што на 7,4 тысячы, або на 1,6%, менш за леташні паказчык, падкрэсліў дакладчык. Сітуацыя ў сферы працы і занятасці характарызуецца зніжэннем колькасці зарэгістраваных беспрацоўных і павелічэннем попыту на працоўную сілу. Узровень рэгістраванага беспрацоўя на канец бягучага года складае 0,2%, што адпавядае леташняму паказчыку. Колькасць грамадзян, якія звярнуліся ў службу занятасці для рэгістрацыі ў якасці беспрацоўных, таксама знізілася на 17,3%. На сёння ў цэнтры занятасці стаіць 700 чалавек замест 1030 на такі ж перыяд мінулага года.
Для нашай вобласці кадравае пытанне застаецца па-ранейшаму актуальным. Трэба прымаць усе меры, каб як мага больш прыцягваць у розныя сферы эканомікі незанятае працаздольнае насельніцтва, а такіх у рэгіёне яшчэ нямала.
"Віцебскія весці"