Найбольшую колькасць працоўных месцаў у Віцебскай вобласці плануюць стварыць у прамысловасці

У Віцебскай вобласці ў 2019 годзе найбольшую колькасць працоўных месцаў будзе створана ў прамысловасці. Прагноз сітуацыі на рынку працы рэгіёна, падрыхтаваны шведскімі, літоўскімі і беларускімі экспертамі, прадставіла сёння ў Віцебску журналістам начальнік упраўлення занятасці насельніцтва камітэта па працы, занятасці і сацыяльнай абароне Віцебскага аблвыканкама Таццяна Аўчыннікава.

"Асноўную колькасць працоўных месцаў будзе створана ў апрацоўчай прамысловасці (60%), сельскай і лясной гаспадарцы (8%), а таксама гандлі. Наймальнікі звярнулі ўвагу, што меры, якія прымаюцца імі для захавання супрацоўнікаў і прыцягнення новых, будуць накіраваны на паляпшэнне якасці працоўных месцаў, умоў працы. Паляпшэнне эканамічных вынікаў дзейнасці ў 2018 годзе дазваляе наймальнікам прагназаваць рост зарплаты супрацоўнікаў", - адзначыла Таццяна Аўчыннікава.

У сувязі з хуткім развіццём тэхналогій і змяненнем характару арганізацыі працы працадаўцы аддаюць перавагу універсальным, тэхнічна адукаваным і гнуткім супрацоўнікам, якія будуць гатовыя ўдасканальваць свае кампетэнцыі і навыкі. Аналіз паказаў, што асноўнымі тэндэнцыямі рынку працы будуць стабілізацыя ўзроўню беспрацоўя, зніжэнне напружанасці, збалансаванасць попыту і прапановы, а таксама павышэнне якасці працоўных рэсурсаў. Большасць наймальнікаў чакаюць паляпшэння перспектыў для прадпрымальніцкай дзейнасці. Амаль 80% працадаўцаў адзначылі, што аб'ём вытворчасці тавараў і паслуг кампаніі вырасце, 18% апытаных не прагназуюць змяненняў, а 2% прадпрыемстваў прагназуюць змяншэнне.

Эксперты склалі спіс прафесій і спецыяльнасцей, якія найбольш і найменш запатрабаваны наймальнікамі. Попытам будуць карыстацца медсёстры, фельчары, урачы, інжынеры, заатэхнікі, педагогі, ляснікі, майстры і акампаніятары. Што тычыцца рабочых кадраў, то вялікая колькасць вакансій прадстаўлена для бетоншчыкаў, кіроўцаў, муляроў, дахаўшчыкоў, токараў, аператараў, кухараў, прадаўцоў, трактарыстаў, зборшчыкаў, швачак, фрэзероўшчыкаў, тынкоўшчыкаў і электрагазазваршчыкаў.

Найбольш складана знайсці працу будзе сацыяльным

работнікам і ліфцёрам. Гэтых спецыялістаў дастаткова на рынку працы. Акрамя таго, чакаецца, што палова ад усіх ліквідуемых месцаў будзе назірацца ў сферы інфармацыі і сувязі. Большасць новых працоўных месцаў створыць прыватны сектар. Прагноз праведзены згодна з метадалогіяй, распрацаванай экспертамі Шведскай дзяржаўнай службы занятасці і Літоўскай біржы працы. Ён заснаваны на аналізе склаўшайся сітуацыі і апытанні суб'ектаў гаспадарчай дзейнасці, змяшчае ацэнку тэндэнцый на рынку працы. Быў апытаны 121 наймальнік з розных сфер эканомікі, у апытанні прынялі ўдзел пераважна прадстаўнікі буйнога бізнесу, як дзяржаўныя (61%), так і прыватныя (39%). Большасць працадаўцаў прадстаўлялі апрацоўчую прамысловасць і сельскую гаспадарку. Колькасць работнікаў арганізацый, якія прымалі ўдзел у апытанні, складала 47 тыс. чалавек.

Праект "Удасканаленне дзейнасці дзяржаўнай службы занятасці насельніцтва Беларусі" рэалізуецца ў адпаведнасці з мемарандумам аб узаемаразуменні, які быў падпісаны ў 2015 годзе камітэтам па працы, занятасці і сацыяльнай абароне Віцебскага аблвыканкама і Шведскай дзяржаўнай службай занятасці. Ён накіраваны на развіццё мадэлі прагназавання і аналізу рынку працы, далейшае ўмацаванне супрацоўніцтва з наймальнікамі і павышэнне інфармаванасці насельніцтва.

БЕЛТА.