Падатковая запазычанасць плацельшчыкаў Віцебскай вобласці за студзень-верасень скарацілася на 63%

15 кастрычніка, Віцебск /Сяргей Кочатаў - БЕЛТА/. Запазычанасць суб'ектаў гаспадарання Віцебскай вобласці па плацяжах у бюджэт за студзень-верасень скарацілася больш чым на 63% у параўнанні з пачаткам года да Br7,5 млрд., паведамілі карэспандэнту БЕЛТА ў прэс-цэнтры інспекцыі Міністэрства па падатках і зборах па Віцебскай вобласці. Толькі за верасень даўгі плацельшчыкаў паменшыліся на Br5,1 млрд. у параўнанні з данымі на канец жніўня. Значнае скарачэнне запазычанасці дасягнута ў выніку комплексу мер, прынятых падатковай службай. Так, з бягучых і валютных рахункаў суб'ектаў гаспадарання было спагнана больш Br120,8 млрд., за кошт спісання дэбіторскай запазычанасці прадпрыемстваў-даўжнікоў у бюджэт паступіла звыш Br98 млрд. Даўгі на суму Br3,2 млрд. пагашаны шляхам вымання ў даўжнікоў наяўных грашовых сродкаў. Усяго ў парадку прымусовага спагнання запазычанасці падатковай службай прыцягнута ў бюджэт Br229,7 млрд., што складае 7,6% агульнай сумы бюджэтных даходаў за 9 месяцаў. Найменшую суму запазычанасці маюць плацельшчыкі, якія ажыццяўляюць дзейнасць у Дубровенскім (каля Br162 тыс.), Шумілінскім (Br277 тыс.), Пастаўскім (Br376 тыс.) і Браслаўскім (Br377 тыс.) раёнах. Самая буйная запазычанасць (амаль Br3 млрд.) чысліцца за прадпрыемствамі і арганізацыямі Віцебска, у тым ліку плацельшчыкі Кастрычніцкага раёна абласнога цэнтра запазычылі бюджэту больш Br2,4 млрд. Асноўнымі бюджэтнымі даўжнікамі з'яўляюцца юрыдычныя асобы розных форм уласнасці, на якіх прыпадае 96% агульнай сумы даўгавых абавязацельстваў. Выключэнне складаюць дзяржаўныя сельскагаспадарчыя прадпрыемствы і сельскагаспадарчыя вытворчыя кааператывы, якія па выніках 9 месяцаў не маюць запазычанасці па плацяжах у бюджэт.-0-