Народны сацыяльны ўніверсітэт прэзентаваны ў Віцебску

Народны сацыяльны ўніверсітэт (НСУ) прэзентаваны ў Віцебску на базе тэрытарыяльнага цэнтра сацабслугоўвання насельніцтва (ТЦСАН) Першамайскага раёна, перадае карэспандэнт БЕЛТА.

Як паведаміла кіраўнік НСУ і дырэктар тэрытарыяльнага цэнтра Таццяна Старынская, новая структура, у адпаведнасці з назвай, уяўляе сабой культурна-асветніцкі цэнтр для ўсіх жадаючых. Ён аб'ядноўвае фармальную і нефармальную адукацыю і будзе спрыяць інтэграцыі з дзяржаўнымі і недзяржаўнымі ўстановамі. НСУ мае на мэце важныя задачы: развіццё чалавека як асобы, задавальненне яго індывідуальных адукацыйных патрэб, стварэнне ўмоў для прыцягнення грамадзян да актыўнай сацыяльнай і грамадскай дзейнасці. Але што самае важнае - заняткі ў НСУ будуць спрыяць псіхалагічнай рэабілітацыі ўсіх, хто апынуўся ў цяжкай жыццёвай сітуацыі.

"Ідэя стварэння народнага ўніверсітэта з'явілася пасля знаёмства з такой формай адукацыі падчас рэалізацыі міжнароднага праекта "Навучальны рэгіён: адукацыя для ўсіх пакаленняў" па праграме падтрымкі Беларусі ФРГ. Праект завяршыўся ў 2014 годзе і даў зразумець, што нефармальная адукацыя запатрабавана насельніцтвам. Розныя формы народных інстытутаў існавалі і ў нас і раней, асабліва цікавая іх канцэпцыя ў царскай Расіі: вядомыя прафесіяналы горада дзяліліся вопытам з усімі жадаючымі. Мы ўзялі яе за ўзор", - растлумачыла Таццяна Старынская.

Першыя курсы НСУ стартавалі яшчэ ў 2014 годзе. За гэты час праект прайшоў апрабацыю, вызначыўся стрыжань пабудовы працы, павялічылася колькасць праграм навучання і факультэтаў. Сёння ў гэтым спісе праваслаўе, каталіцкае асветніцтва, псіхалагічны факультэт і факультэт замежных моў, журналістыка, турызм і краязнаўства, свет новых тэхналогій, факультэт фізічнай і рухальнай актыўнасці, музычна-тэатральны факультэт, творчыя майстэрні, адукацыя і асветніцтва.

Акрамя ТЦСАН Першамайскага раёна ўніверсітэт ажыццяўляе сваю практычную дзейнасць таксама на базе арганізацый, прадпрыемстваў, устаноў горада, з якімі ёсць дамоўленасці аб супрацоўніцтве на бязвыплатнай аснове. Да выкладання прыцягваюцца спецыялісты розных абласцей ведаў, заслужаныя, аўтарытэтныя і цікавыя людзі горада. Заняткі праходзяць згодна з праграмамі адзін раз на тыдзень. Навучанне бясплатнае і даступна ўсім жыхарам горада. Пераважна курсы наведваюць працаздольныя грамадзяне ва ўзросце 30-50 гадоў. Слухачы НСУ могуць выбраць некалькі факультэтаў па жаданні. Па выніках курсаў яны атрымліваюць сертыфікат аб заканчэнні.

Кацярына Князева