Навукова-вытворчы комплекс "Націўта" адкрыўся ў Бешанковічах
Тут пабудаваны сучасны высокатэхналагічны комплекс, спраектаваны і створаны пры садзейнічанні экспертаў-кансультантаў з краін Еўрапейскага саюза і СНД. Спецыяльныя ізалюючыя тэхналогіі забяспечваюць высокі ўзровень якасці выпускаемай прадукцыі, а таксама бяспеку персаналу і навакольнага асяроддзя.
Вытворчыя магчымасці дазваляюць вырабляць лекавыя сродкі (у таблетаваных, капсульных і вадкіх формах) па поўным цыкле ў адпаведнасці з патрабаваннямі еўрапейскага стандарту GMP. Фармацэўтычнае прадпрыемства ў першую чаргу арыентавана на распрацоўку і выпуск інавацыйных лекаў для лячэння анкалагічных захворванняў. На прадпрыемстве створаны ўнікальны для Беларусі участак, дзе вырабляюць цытастатычныя прэпараты ў цвёрдых формах з прымяненнем ізалятараў італьянскай кампаніі Nicomac. Характэрна, што яшчэ да адкрыцця вытворчасці "Націўта" рэгістравала і прадавала свае лекі ў Беларусі.
Фасоўка і ўпакоўка вялася на беларускім прадпрыемстве "Акадэмфарм", але ў далейшым яны будуць выпускацца на фармзаводзе ў Бешанковічах. На рахунку кампаніі 13 зарэгістраваных прадуктаў. Плануецца, што ў 2017 годзе гэты пералік пашырыцца да 20 прэпаратаў. Амбіцыйныя планы кампаніі не абмяжоўваюцца асваеннем беларускага рынку. У 2017 годзе прадпрыемства пачне рэгістрацыю лекавых сродкаў у краінах ЕС. Ёсць дамоўленасці аб рэгістрацыі прэпаратаў на рынках В'етнама, Азербайджана, Казахстана, Расіі, Ірака і Сірыі. У цэлым у сферы экспартных інтарэсаў "Націўты" знаходзіцца 15 краін.