Названа дзясятка найлепшых кіраўнікоў Прыдзвіння і тройка найлепшых канструктараў

Выявіць выдатных кіраўнікоў дапамагае абласны конкурс «Найлепшы кіраўнік года». Нядаўна ў рамках чарговага пасяджэння Віцебскага абласнога саюза наймальнікаў, на якім разглядалася пытанне павышэння якасці і канкурэнтаздольнасці прадукцыі, былі ўручаны памятныя знакі і дыпломы найлепшым кіраўнікам прадпрыемстваў Віцебска па выніках працы за 2012 год. Што тычыцца пераможцаў,
якія ўзначальваюць суб'екты гаспадарання, размешчаныя ў раёнах, то іх будуць ушаноўваць на месцах – у рэгіянальных філіялах абласнога саюза наймальнікаў.

Старшыня Віцебскага абласнога саюза наймальнікаў Уладзімір Туравінаў адзначыў, што выбар пераможцаў ажыццяўляўся па некалькіх крытэрыях, у тым ліку ўлічваліся эканамічныя паказчыкі працы прадпрыемстваў, а таксама асабістыя якасці прэтэндэнтаў. Сёлета звання лаўрэата ўдастоены 10 кіраўнікоў – Яўгеній Езярскі (РУП па транспарціроўцы і забеспячэнні звадкаванымі газамі), Уладзімір Рогаўнеў (ТАА «Юджэн», Наваполацк), Віталь Аселядзец (КУП ВКХ «Аршаводаканал»), Сяргей Раманенка (філіял «Камбінат ЖБІК» ААТ «Аршанскі будаўнічы трэст №18», Валерый Дулінскі (ААТ «Глыбоцкі МКК»), Уладзімір Сазон (КУП «Віцебскі кандытарскі камбінат «Віцьба»), Пётр Прыжытомскі (ААТ «Кераміка»), Андрэй Машчанка (УПП «Віцебчанка»), Сяргей Старавойтаў (РДУП «Беларуснафта-Віцебскаблнефцепрадукт»), а таксама адзіная жанчына ў мужчынскай кампаніі – Святлана Сінкевіч (УПП «Полацк-Торг»).

Гэтыя кіраўнікі неабыякавыя да лёсу сваіх прадпрыемстваў і людзей, якія там працуюць. Напрыклад, чатыры гады таму, калі Андрэй Машчанка не з'яўляўся дырэктарам УПП «Віцебчанка», 95 працэнтаў выпускаемай тут прадукцыі складалі давальніцкія заказы. Сёння гэты паказчык знізіўся да 70 працэнтаў. У бліжэйшых планах давесці яго да 50.

– 2012 год для нас склаўся дастаткова ўдала, хоць узнікалі пэўныя
складанасці, – кажа Андрэй Машчанка. – Але калектыў прыклаў максімум намаганняў, каб прадпрыемства засталося на плаву. Больш за 3 мільярды рублёў было ўкладзена ў мадэрнізацыю і тэхнічнае перааснашчэнне УПП «Віцебчанка». У цяперашні час знос абсталявання складае ўсяго 28 працэнтаў. Таму ў бягучым годзе будзем удасканальваць тэхналагічныя працэсы, працаваць над зніжэннем сабекошту прадукцыі і прасоўваць свае вырабы на знешнія рынкі. Пры гэтым Андрэй Сяргеевіч не выключае магчымасці адкрыцця на «Віцебчанцы» новага вытворчасці, нават не звязанага з асноўнай дзейнасцю прадпрыемства.

Трэба адзначыць, што на пасяджэнні Віцебскага абласнога саюза наймальнікаў ушанавалі не толькі лепшых кіраўнікоў Прыдзвіння. Названы імёны пераможцаў першага абласнога конкурсу «Лепшы канструктар года». Гэта Людміла Яцкоўская (вядучы канструктар ЗАТ «Свіцянка»), Аляксандр Аляксееў (начальнік КБ №2 ААТ «ВЗЭП») і Мікалай Субоч (канструктар УП «Зара»).

Пасля афіцыйнай цырымоніі ўзнагароджання для ўдзельнікаў пасяджэння была арганізавана экскурсія па цэхах Віцебскага кандытарскага камбіната «Віцьба». Для правядзення мерапрыемства, на якім абмяркоўвалася пытанне павышэння якасці і канкурэнтаздольнасці прадукцыі, не выпадкова выбрана менавіта гэта прадпрыемства. Па-першае, дырэктар КУП «ВКК «Віцьба» Уладзімір Сазон – у ліку лепшых кіраўнікоў Прыдзвіння. Па-другое, Віцебскі кандытарскі камбінат ужо сёлета папоўніў скарбонку сваіх дасягненняў некалькімі прэстыжнымі ўзнагародамі, у тым ліку і міжнароднымі. Гэта красамоўна сведчыць аб тым, што ў высокай якасці выпускаемай тут прадукцыі сумнявацца не даводзіцца. Пацвярджэннем таму служыць і асваенне новых рынкаў збыту. Вырабы пад гандлёвай маркай «Віцьба» прыйшліся па душы спажыўцам Расіі, Украіны, Малдовы, Казахстана. Пробныя партыі адпраўлены ў Эстонію, Аб'яднаныя Арабскія Эміраты, ЗША. Вядуцца перамовы з Ізраілем.

Алена СЫС. Фота Дзмітрыя ОСІПАВА. «Віцебскі рабочы»