Неабходнасць прыняцця мер па скарачэнні выдаткаў стаіць на парадку дня ў Віцебскай вобласці
За 4 месяцы бягучага года кансалідаваны бюджэт Віцебскай вобласці выкананы з дэфіцытам Br313 млрд, што патрабуе неадкладнага прыняцця мер па скарачэнні расходаў. Аб гэтым паведаміў сёння на планавым пасяджэнні прэзідыума абласнога Савета дэпутатаў яго старшыня Аляксандр Ацясаў, перадае карэспандэнт БЕЛТА.
Вынікі выканання бюджэту за 4 месяцы выклікаюць нямала пытанняў. "Больш таго, мы пад абслугоўванне гарантый заклалі ў яго Br211 млрд, і ўсё роўна маем дэфіцыт. Раёны і гарады ўжо выкарысталі Br187 млрд свабодных рэшткаў і яшчэ Br177 - з абласнога бюджэту. Наспела сітуацыя, якая патрабуе тэрмінова праводзіць балансіроўку бюджэтаў гарадоў і раёнаў па даходах і расходах", - растлумачыў Аляксандр Ацясаў.
Па яго словах, на выкананне бюджэту і ў цэлым працу эканамічнага сектара краіны, уключаючы Віцебскую вобласць, паўплывалі падзеі ў свеце, змены курсаў расійскага і беларускага рубля, наступленне даўгавых абавязацельстваў перад сусветнымі банкамі, валютнымі фондамі. Як дадаў старшыня аблсавета, маецца недаімка па плацяжах у кансалідаваны бюджэт, запазычанасць па падаходным падатку, і крэдыторская запазычанасць прыкметна вырасла з пачатку года. Пры гэтым вобласць выпусціла першы транш аблігацый у суме Br1,3 трлн, пад іх абслугоўванне бюджэты гарадоў і раёнаў сканцэнтравалі сродкі. Пагашэнне ўжо пачалося, але праходзіць у вельмі складаных умовах.
Па словах намесніка начальніка галоўнага фінансавага ўпраўлення аблвыканкама Інны Юшчанка, сітуацыя патрабуе прыняцця неадкладных мер па скарачэнні расходаў і крэдыторскай запазычанасці. Асаблівую ўвагу трэба звярнуць на балансіроўку бюджэту ў тых рэгіёнах, дзе складваецца самы значны недахоп сродкаў. Пры гэтым павінны быць захаваны фінансавыя рэзервы.
Сярод мер па скарачэнні расходаў прапанавана: зніжэнне затрат на бягучае ўтрыманне аб'ектаў добраўпарадкавання, рэканструкцыю і капітальныя рамонты, набыццё абсталявання (акрамя медыцынскага) і іншых расходаў, у тым ліку на правядзенне культурна-масавых мерапрыемстваў. Неабходна працягнуць аптымізацыю штатнай колькасці і сеткавых паказчыкаў бюджэтных устаноў у галінах фізкультуры і спорту, культуры, адукацыі, аховы здароўя. Таксама скарачэнню бюджэтнага фінансавання будзе спрыяць рост даходаў бюджэтных арганізацый ад пазабюджэтнай дзейнасці і ўласных даходаў арганізацый, якія атрымліваюць субсідыі.
"Нараўне з рацыянальным і эканомным расходаваннем сродкаў найважнейшым складнікам з'яўляецца максімальна поўнае прыцягненне ў бюджэт падаткаў і непадатковых плацяжоў", - заключыла Інна Юшчанка.
Кацярына Князева