Незалежны назіральнік аб безбар'ерным асяроддзі на ўчастках для галасавання: усё абсталявана як мае быць
Вольфганг Васічак у першы раз выступаў з місіяй назіральніка ў выбарчай кампаніі і ўпершыню наведаў Беларусь. У яго склаліся станоўчыя ўражанні ад краіны і людзей. Ён паспеў пабываць у Мінску і азнаёміцца з мясцовымі славутасцямі Віцебска. На рэферэндуме міжнародны назіральнік звярнуў увагу на многія аспекты, у тым ліку на арганізацыю галасавання для людзей з абмежаванымі магчымасцямі. "У мяне ёсць сябар-інвалід, і мне важна, каб людзі з інваліднасцю, пажылыя маглі прыйсці на ўчасткі. Добра, што ў такіх людзей ёсць магчымасць прачытаць тэксты на ўчастках, прысутнічаюць дасведчаныя людзі, якія дапамагаюць і тлумачаць, калі з'яўляюцца пытанні", - падкрэсліў незалежны назіральнік.
Няпростая сітуацыя ў свеце турбуе жыхара еўрапейскай краіны. "У Аўстрыі ёсць традыцыя дыпламатычных адносін з рознымі краінамі. І нават калі бываюць канфлікты, мы заўсёды гатовыя выбудоўваць платформы для зносін. Я вельмі спадзяюся як грамадзянін Аўстрыі, што нашы палітыкі і дыпламаты, нават пад ціскам розных сіл, успомняць гэтыя традыцыі і палепшаць сувязі, у тым ліку з Беларуссю", - распавёў міжнародны назіральнік.
Вольфганг Васічак адзначыў, што гэты візіт у Беларусь стане для яго адпраўной кропкай для новых падарожжаў па Сінявокай. На памяць аб краіне ён забярэ з сабой шмат кніг, у тым ліку па гісторыі Беларусі. Аўстрыец наведаў музей Марка Шагала, пабываў у музеі гісторыі Віцебскага народнага мастацкага вучылішча, дзе калісьці вучыўся знакаміты жывапісец.
"Вельмі цікаўлюся вашай краінай. Цяпер палітычныя абставіны складаныя, але, на маё меркаванне, Беларусь - важная частка Еўропы. І гэта ў інтарэсах Еўропы і маёй краіны Аўстрыі, каб сувязі з Беларуссю хутчэй палепшыліся, нягледзячы на міжнародны крызіс. Я думаю, што галоўная задача дыпламатаў - захоўваць і паляпшаць сувязі. Заўсёды сябрам лягчэй дамовіцца, чым ворагам", - падкрэсліў госць Беларусі.
Усяго ў Віцебскай вобласці, як паведамілі ў аблвыканкаме, на рэферэндуме працуюць восем міжнародных назіральнікаў.
