Мікалай Шэрснёў: «БелВітуніфарм» дэманструе ўстойлівую дынаміку росту па ўсіх паказчыках
Па словах Мікалая Мікалаевіча, у свой час кампанія апынулася ў дастаткова складанай фінансавай сітуацыі. Аднак працэс стабілізацыі ўжо прайшоў - зараз "БелВітуніфарм" дэманструе ўстойлівую дынаміку росту па ўсіх паказчыках. "Сёння прадпрыемства абавязана выбудоўваць новую дарожную карту. Мы павінны разумець, якія ветпрэпараты запатрабаваны, як увязаць дзейнасць "БелВітуніфарма" з вытворчасцю і сельскагаспадарчымі арганізацыямі, якія неабходна рэалізаваць інавацыйныя праекты, каб атрымаць прадукцыю, запатрабаваную на айчынным і знешніх рынках", - адзначыў Мікалай Шарснёў.
Адпраўныя кропкі для выпрацоўкі адзінай комплекснай праграмы па ўсіх пазначаных напрамках кіраўніцтва "БелВітуніфарма" мае, лічыць кіраўнік вобласці. Больш таго, прадпрыемства валодае ключавымі для рэалізацыі інвестпраектаў кампанентамі - сыравінай і камандай дасведчаных прафесіяналаў.
Па словах дырэктара ААТ Сяргея Бальшакова, першы праект коштам каля Br6 млн звязаны з вытворчасцю прэпаратаў ад шаленства. Бізнес-план па ім ужо гатовы. Эфектыўнасць праглядаецца высокая: праект акупіцца праз два гады. Прыступіць да яго рэалізацыі нават без старонскай падтрымкі, толькі за кошт уласных сродкаў, прадпрыемства мае намер у бліжэйшы час.
Другі перспектыўны імпартазамяшчальны праект датычыцца развіцця сыварадкавай вытворчасці прэпаратаў крыві. "Для нас гэта сур'ёзны крок наперад, бо падобнага ў Беларусі на дадзены момант няма. Патрэба рынку толькі па нашай краіне, мы бачым, ужо перавышае планаванага да выпуску першапачатковага гадавога аб'ёму", - распавёў кіраўнік. Кошт гэтага праекта - $2 млн. Аднак прадпрыемства абмежавана ў абаротных сродках (асноўны аб'ём накіроўваецца на развіццё вытворчасці ветэрынарных прэпаратаў, а частка выручкі штогод сыходзіць на пагашэнне старых даўгоў), таму пакуль вымушана крыху адсунуць тэрмін яго рэалізацыі.
Падчас сустрэчы Сяргей Бальшакоў таксама выказаў прапановы, якія пойдуць на карысць як прадпрыемству, так і жывёлагадоўчай галіне рэгіёну. У тым ліку было агучана наступнае: "БелВітуніфарм" гатовы ўзяць на сябе абавязацельствы па фарміраванні адзінай сістэмы ветэрынарнай службы рэгіёну. Для гэтага спецыялісты прадпрыемства на працягу 2020-2021 гадоў правядуць атэстацыю ўсіх ветурачоў вобласці з мэтай вызначэння агульнага зрэзу іх кампетэнцыі і фарміравання рэзерву з ліку найбольш пісьменных спецыялістаў, а таксама сістэмна арганізуюць заняткі па павышэнні практычных навыкаў. "У нас і зараз такія мерапрыемствы праходзяць (лекцыі, абмеркаванні, круглыя сталы), яны даюць рэальны эфект, бо дазваляюць удзельнікам падчас абмену досведам падымаць свой асабісты ўзровень. Да нас прыязджаюць спецыялісты нават з Брэсцкай вобласці на такія сустрэчы", - адзначыў дырэктар.
У размове з журналістамі, падводзячы вынік наведвання прадпрыемства, Мікалай Шарстнёў адзначыў, што падчас сустрэчы былі вызначаны ключавыя напрамкі развіцця. "Мы вызначылі, чым будзем займацца ў бліжэйшы час, як звязаць ветпрэпараты, якія выпускаюцца "БелВітуніфармам", з вытворцамі, як пайсці далей, кантраляваць уплыў прэпаратаў, навучаць нашых спецыялістаў на месцах, гэта значыць шчыльна ў комплексе ўзаемадзейнічаць", - заключыў старшыня аблвыканкама.
ААТ "БелВітуніфарм" з'яўляецца вядучым прадпрыемствам біялагічнай прамысловасці Беларусі, якое спецыялізуецца на складаных інавацыйных лячэбна-прафілактычных і біялагічных прэпаратах для патрэб ветэрынарыі. Іх асартымент уключае больш за 150 найменняў. На долю прадпрыемства прыходзіцца практычна 50% ад агульнага аб'ёму ветэрынарных прэпаратаў, якія выкарыстоўваюцца ў краіне.