Мікалай Шарснёў азнаёміўся з навінкамі вытворчасці і ходам мадэрнізацыі Віцебскага завода электравымяральных прыбораў
З 2013 года «ВЗЭП» уваходзіць у холдынг «Аўтакампаненты». За гэты перыяд сярод работнікаў склалася меркаванне аб неабдуманасці прынятага рашэння. Па словах прадстаўніка прафкама, з таго, як складаюцца адносіны яго ўдзельнікаў, ствараецца ўражанне, што структура выкарыстоўвае патэнцыял віцебскага вытворцы выключна ў сваіх мэтах, пры гэтым не ўлічвае інтарэсы і перспектывы развіцця «ВЗЭП». У сувязі з гэтым калектыў звярнуўся да кіраўніка вобласці па садзейнічанне ў вырашэнні пытання аб перадачы прадпрыемства з рэспубліканскай у камунальную ўласнасць.
Агульныя падыходы да гэтага пытання Мікалая Шарснёва добра вядомыя: прадпрыемствы павінны быць у веданні мясцовых органаў улады, якія зацікаўлены ў іх росквіце, у забеспячэнні занятасці працуючых там людзей. Гэта пацвярджае, напрыклад, інвестыцыйная актыўнасць прамысловага комплексу Віцебшчыны: калі камунальныя арганізацыі пастаянна нарошчваюць укладанні ў развіццё, то на рэспубліканскіх адзначаецца адваротная тэндэнцыя. З іншага боку, Мікалай Шарснёў перакананы, што сёння ў жорсткай канкурэнцыі шанцы на выжыванне значна ўзрастаюць у буйных гульцоў. Аб'яднанне тэхналагічна звязаных вытворцаў адкрывае новыя магчымасці для крэдытавання, тэхнічнага пераўзбраення, павышэння якасці менеджменту.
Прысутныя на сустрэчы кіраўнікі Міністэрства прамысловасці і холдынгу «Аўтакампаненты» прызналі, што ў інтэграцыйнай структуры сабраны тэхналагічна разнастайныя прадпрыемствы. Па сутнасці, іх аб'ядноўвае толькі агульны канчатковы спажывец, што палягчае працу на экспарт. Звяртаючыся да рэспубліканскіх калег, Мікалай Шарстнёў падкрэсліў, што толькі сумеснымі намаганнямі з мясцовай уладай пры поўным узаемаразуменні і падтрымцы можна фарміраваць будучыню прамысловай галіны і вырашаць бягучыя праблемы канкрэтных вытворцаў.
— Працоўны калектыў павінен разумець, што ў яго будзе праца, заработная плата, і бачыць перспектывы развіцця, тады і не будзе ўзнікаць пытанняў уласнасці. Таму трэба старанна вывучыць праблему і прыняць узважанае рашэнне, зноў жа абавязкова з улікам меркавання работнікаў. Калі неабходна, то я падключуся і падтрымаю іх рашэнне, — рэзюмаваў старшыня аблвыканкама.
За перадачу завода ў камунальную ўласнасць выступіў і кіраўнік Віцебскага абласнога саюза наймальнікаў Уладзімір Туравінаў:
— Прадпрыемства ў нас не прападзе, тым больш, што ў яго ёсць кампетэнцыі, якімі карыстаюцца многія арганізацыі рэгіёна.
Па словах дырэктара «ВЗЭП» Яўгена Лядвіна, завод працуе з добрай загрузкай (па асобных вытворчасцях да 80%), што забяспечвае фінансавую ўстойлівасць. За 4 месяцы 2021 года аб'ём атрыманага чыстага прыбытку перавысіў 820 тыс. рублёў. Больш за 70% у агульным аб'ёме вытворчасці прыпадае на электравымяральныя прыборы для аўтамабільнай прамысловасці. Сярод асноўных спажыўцоў — вядучыя прадпрыемствы аўтапрама Беларусі і Расіі, куды адгружаецца да 96% аб'ёму экспартнай прадукцыі.
Сёння ў вытворчым партфелі «ВЗЭП» нямала навінак аўтаэлектроннай прадукцыі. Па словах Яўгена Лядвіна, створаныя на прадпрыемстве прыборныя шчыткі для МАЗа і МТЗ выкананы на ўзроўні сусветных аналагаў, у іх закладзены распрацаваныя заводскімі канструктарамі новыя схемотэхнічныя рашэнні. Выпуск такіх навінак з больш высокімі якаснымі характарыстыкамі стаў магчымым дзякуючы рэалізацыі інвестыцыйнага праекта па стварэнні высокапрадукцыйнай зборачнай вытворчасці на базе аднаго з цэхаў. Аб'ём інвестыцый перавысіў 2 млн рублёў, палова з якіх прыпадае на ўласныя сродкі акцыянернага таварыства. Гэта дазволіла палепшыць умовы працы спецыялістаў, пашырыць тэхналагічны патэнцыял «ВЗЭП». На чарзе мадэрнізацыя яшчэ аднаго цэха, да абнаўлення якога плануецца прыступіць у 2022 годзе.
— У ім будуць арганізаваны фінальная зборка і аўтаматызаваная праверка аўтаэлектронных вырабаў. Частка абсталявання для новай зборачнай вытворчасці распрацавана і выраблена непасрэдна на нашым прадпрыемстве, прычым мы абаранілі яго патэнтам на вынаходства, — адзначыў Яўген Лядвін.
Падчас рабочай паездкі Мікалай Шарснёў пабываў у цэхах, азнаёміўся з навінкамі вытворчасці і ходам мадэрнізацыі, а таксама правёў прыём па асабістых пытаннях работнікаў прадпрыемства.