Мікалай Шарснёў наведаў ААТ «Полацк-Шкловалакно»
З году ў год – прырастаць, ствараючы аснову для ўстойлівага развіцця на шмат гадоў наперад. Так вызначыў галоўную задачу прамысловасці Віцебшчыны Мікалай Шарснёў падчас наведвання аднаго з найбуйнейшых прадпрыемстваў рэспублікі – ААТ «Полацк-Шкловалакно».
Сёння полачане па праву ўваходзяць у кагорту вядучых сусветных вытворцаў шкловалакна і матэрыялаў на яго аснове
У цэхах прадпрыемства вырабляюць каля 900 найменняў прадукцыі, 92% якой пастаўляецца за межы Беларусі ў 47 краін свету. У бліжэйшыя дні прадстаўнікі кіраўніцтва вылятаюць у Амерыку і Японію для заключэння з гэтымі краінамі кантрактаў на наступны год.
– На дадзены момант, – адзначыў намеснік генеральнага дырэктара па камерцыйных пытаннях Алег Курылін, – мы ўсё прадаем з колаў. Запасы гатовай прадукцыі мінімальныя, і тыя прадстаўлены несезонным асартыментам. Існуючых аб'ёмаў недастаткова, каб задаволіць попыт, таму рэалізуемыя праекты накіраваны ў тым ліку на павелічэнне колькасці выпускаемай прадукцыі.
Пашырыць магчымасці для развіцця і нядаўняя рэгістрацыя ААТ «Полацк-Шкловалакно» ў якасці рэзідэнта свабоднай эканамічнай зоны «Віцебск».
– Жыццё патрабуе новага ўзроўню якасці атрымання прадукту, таму мы ўважліва сочым за рынкам і развіваем перспектыўныя напрамкі, якія маюць тэндэнцыю да росту, каб вырабляць тое, што будзе найбольш запатрабавана, – падкрэсліў генеральны дырэктар прадпрыемства Андрэй Бунакоў.
Адзін з экспартаарыентаваных інвестыцыйных праектаў – будаўніцтва цэха па вытворчасці тэрмахімапрацаваных электраізаляцыйных матэрыялаў для фальгіраваных дыэлектрыкаў. Яго рэалізацыя ў 2020 годзе дазволіць дадаткова апрацоўваць 2 млн м тканіны, неабходнай у галіне радыёэлектронікі.
Распрацоўваемыя напрамкі канструкцыйных і будаўнічых матэрыялаў, высокатэмпературнай цеплаізаляцыі таксама маюць тэндэнцыю да пашырэння. Дзякуючы ўкараненню сучасных тэхналогій, кваліфікацыі персаналу прадпрыемства забяспечвае высокія стандарты вытворчасці і якасці прадукцыі.
У 2017 годзе акцыянернае таварыства ўдастоена адной з самых прэстыжных узнагарод – Прэміі ўрада Рэспублікі Беларусь за дасягненні ў галіне якасці
Падчас знаёмства з прадпрыемствам Мікалай Шарснёў сустрэўся з кіраўніцтвам ААТ «Полацк-Шкловалакно», агледзеў узоры прадукцыі, пабываў у цэхах, падрабязна ўнікаючы ў нюансы вытворчага працэсу. Па выніках візіту кіраўнік вобласці даў высокую ацэнку працы калектыву.
– Можна з упэўненасцю сказаць, – адзначыў ён, – што прадпрыемства з кожным годам набірае ўстойлівы тэмп росту. Паляпшаецца эканоміка, расце прыбытак, рэалізуюцца амбіцыйныя праекты. Але сусветны рынак трэба заваёўваць пастаянна. І тут важна не ўпусціць час, не супакоіцца – інакш можна апынуцца за бортам сучасных працэсаў. Каб гэтага не адбылося, мы сумесна з канцэрнам павінны разумець праграму развіцця дадзенага прадпрыемства, дзе неабходна, аказваць яму ўсялякае садзейнічанне.
Старшыня аблвыканкама наведаў таксама філіял ААТ «Віцебскхлебапрам» Полацкі хлебазавод. У цэлым бягучы стан спраў у прамысловым сектары Віцебшчыны Мікалай Шарснёў назваў дастаткова ўстойлівым: ёсць добрыя паказчыкі і ў вытворчай частцы, і ва знешнім гандлі. Аднак і тут нельга спыняцца на дасягнутым.
– Неабходна стварыць такія ўмовы, каб з году ў год не проста ўстойліва працаваць, а прырастаць. Набраўшы пэўную стабільнасць, мы павінны вырашаць пытанні такім чынам, асабліва па галоўных валаўтваральных прадпрыемствах, каб эфект быў на дзесяцігоддзі, – падкрэсліў кіраўнік вобласці.