Мікалай Шарснёў правёў «прамую лінію» з жыхарамі Віцебшчыны

Каля 30 званкоў ад жыхароў Віцебшчыны прыняў старшыня аблвыканкама Мікалай Шарснёў падчас «прамой лініі», якая прайшла ў мінулую суботу.

Падводзячы вынікі зносін з насельніцтвам, кіраўнік вобласці падкрэсліў, што такая форма работы, як «прамыя лініі», безумоўна, карысная. Людзі ў асноўным задаюць набалелыя пытанні, якія па тых ці іншых прычынах не вырашаюцца. Праўда, большасць з іх знаходзіцца ў кампетэнцыі мясцовай улады. Некаторыя лічаць, што званок губернатору гарантуе станоўчы зыход справы. Але, як адзначыла начальнік аддзела па рабоце са зваротамі грамадзян і юрыдычных асоб аблвыканкама Ілона Шульга, толькі 15% зваротаў вырашаюцца на карысць заяўнікаў. Любы прадстаўнік улады, і гэта падкрэсліваў падчас размоў з жыхарамі Віцебшчыны Мікалай Шарснёў, кіруецца ў першую чаргу законам.

Кіраўнік вобласці звярнуў увагу на яшчэ адну тэндэнцыю: людзі часцей сталі звяртацца з бытавымі праблемамі: навесці парадак у пад'ездзе, паставіць бардзюр, засыпаць яму. Такіх званкоў на мінулай тэлефоннай лініі было нямала. У прыватнасці, дачніца з Віцебскага раёна цікавілася, як праверыць якасць вады і зрабіць калодзеж на яе ўчастку, жанчына з Оршы хацела б пасадзіць кветкі каля дома, але ЖЭУ не прывозіць зямлю, а жыхары дома на Белабародава, 5 у Віцебску прасілі добраўпарадкаваць двор. І хоць там пракладзены тратуарныя дарожкі, разбіты клумбы, хочацца, каб было лепш. Яны таксама выказалі просьбу ўсталяваць шлагбаум для аўтамабіляў, якія тут часта паркуюцца, бо побач знаходзіцца гандлёвы цэнтр «Беларусь». Але гэта не дазваляе зрабіць ДАІ, паколькі загарода ўскладніць пад'езд да дома хуткай дапамогі і пажарнай машыны.

Былі і іншыя жыццёвыя пытанні, напрыклад, аб недастатковай колькасці рэйсаў гарадскіх аўтобусаў на могілкі Копці.

– Яны ходзяць толькі ў выхадныя, а ў буднія дні можна даехаць на прыгарадным аўтобусе, у якога толькі два рэйсы. Яшчэ адна праблема – часта адсутнічае вада на могілках, – тлумачыць жыхарка Віцебска.

Губернатар даў распараджэнне вывучыць запатрабаванасць дадзенага маршруту і аператыўна вырашыць праблему з водазабеспячэннем. Ён таксама звярнуў увагу на тое, што ўсе могілкі, у тым ліку і сельскія, павінны быць добраўпарадкаваны. І не толькі да святаў. Магчыма, патрэбны наглядчыкі, якія б увесь час сачылі за парадкам.

Разам з Мікалаем Шарснёвым на «прамой лініі» з насельніцтвам прысутнічалі старшыні ўсіх райвыканкамаў (у рэжыме відэаканферэнцсувязі), а таксама кіраўнікі падраздзяленняў аблвыканкама, якія тлумачылі тую ці іншую праблему, а таксама бралі на заметку даручэнні кіраўніка вобласці. Званкі паступілі з Віцебска, Полацка, Оршы, Браслаўскага, Ушацкага, Дубровенскага, Чашніцкага, Лепельскага і іншых раёнаў.

Сярод надзённых пытанняў – затрымка заробкаў і дзіцячых дапамог. Шматдзетная маці з Ушацкага раёна з мая не можа атрымаць належныя ёй грошы, не выплачваюць тры месяцы зарплату і жывёлаводы Чашніцкага райаграсэрвісу. Не разлічыліся за працу з будаўніком у адным з гаспадарак Сянненскага раёна. Як запэўнілі кіраўнікі мясцовай улады, даўгі людзям у бліжэйшы час будуць аддадзены. А вось жыхару Оршы, які ўладкаваўся на працу на аўтастаянку без афармлення якіх-небудзь дакументаў, дапамагчы складаней. Але старшыня райвыканкама Мікалай Лісоўскі абяцаў разабрацца, чаму такое адбываецца.

Навасёлы з Наваполацка скардзіліся на тое, што даводзіцца засяляцца ў шматкватэрны дом, дзе няма святла, газу і вады. Ім кажуць, што затрымка адбываецца з-за таго, што не створана таварыства ўласнікаў. Але жыльцы пакуль не бачаць кагосьці ў ролі старшыні. У ЖРЭУ жа, у ведамства якога перадалі дом, не заключаюць індывідуальныя дамовы на карыстанне камунальнымі паслугамі. Старшыня Наваполацкага райвыканкама Дзмітрый Дзямідаў, які ўдзельнічаў у размове, паабяцаў жыльцам да 1 жніўня падключыць дом да камунікацый.

Сярод званкоў, што паступілі, былі і падзяка на адрас работнікаў Лепельскага райвыканкама, прапанова праводзіць Дні пісьменства ў Полацку, занепакоенасць з нагоды недабудаванай бальніцы ў Оршы. Гэта значыць, людзі звяртаюцца да кіраўніка вобласці не толькі каб вырашыць асабістыя праблемы, але і хочуць выказаць сваё меркаванне, выказаць зацікаўленасць у агульнай справе.

Па кожным званку дадзены даручэнні адказным службам аб'ектыўна разабрацца з праблемай і знайсці законнае рашэнне.

Таццяна Пастарнак, "Віцебскія весці"