Мікалай Шарснёў правёў выязны прыём грамадзян у ААТ «Віцебскхлебпрам»

– Ранняй вясной і дажджлівай восенню мы апыняемся адрэзанымі ад свету з-за велізарных луж на дарозе, – распавяла кіраўніку рэгіёну работніца завода Ірына Маркевіч, якая пражывае на вуліцы Лясной у Сасноўцы Віцебскага раёна. Праблему, мяркуе жанчына, можна было б вырашыць падсыпкай некаторых участкаў дарогі, тым больш што ў 2013 годзе пасля звароту на «гарачую лінію» аналагічныя работы праводзіліся, але прайшоў час, і пытанне зноў актуалізавалася. Глабальных цяжкасцей у дадзеным выпадку няма, лічыць і старшыня аблвыканкама. Дарогу пры прыдатных умовах надвор'я адрамантуюць.

Зноў на прыёме ў кіраўніка вобласці было ўзнята пытанне будаўніцтва і ўводу ў эксплуатацыю паліклінікі ў мікрараёне Юг-7. Надзеі Старавойтавай Мікалай Мікалаевіч растлумачыў, што сёлета плануецца комплексна завяршыць будаўніцтва многіх пачатых аб'ектаў аховы здароўя, зараз прапрацоўваюцца крыніцы фінансавання (кітайскія інвестыцыі, праз Банк развіцця, прыцягненне бюджэтных сродкаў), і запэўніў, што ў 2018-м паліклініка будзе пабудавана.

Па дапамогу да кіраўніцтва рэгіёну звярнуўся і Ігар Анціфораў. Мужчына атрымаў участак пад будаўніцтва ў Андронавічах, узвёў дом, правёў многія камунікацыі, але да гэтага часу не вырашана пытанне з водаправодам. Трубы праведзены, а падключыцца да цэнтральнага водазабеспячэння ён, як і многія яго суседзі, не можа. Праблему, як запэўнілі на прыёме кампетэнтныя спецыялісты, устраняць ужо ў жніўні, калі завершыцца будаўніцтва інжынерных сістэм і добраўпарадкавання. Адпаведныя дакументы зараз на ўзгадненні, сродкі (гэта каля 80 тысяч рублёў) будуць знойдзены.

– Усе асноўныя пытанні, з якімі сутыкаюцца жыхары, няхай гэта будзе яма, лужа, дрэнная дарога, непаладкі водаправода, знаходзяцца на паверхні і павінны вырашацца на першасным узроўні, – адзначыў Мікалай Шарснёў, растлумачыўшы, што з-за

безадказнасці мясцовых спецыялістаў людзі вымушаны звяртацца ў больш высокія інстанцыі. – З такімі праявамі будзем змагацца з дапамогай зваротнай сувязі. Для гэтага і праводзяцца «прамыя лініі», асабістыя прыёмы грамадзян. Мы праз людзей будзем аказваць уплыў на тых, хто павінен наводзіць парадак. Я б хацеў, каб у вобласці быў пачуты кожны, – падкрэсліў Мікалай Шарстнёў у размове з журналістамі.

Пасля прыёму грамадзян кіраўнік вобласці адправіўся ў вытворчыя цэхі ААТ «Віцебскхлебпрам». Генеральны дырэктар прадпрыемства Міхаіл Рог і Мікалай Шарстнёў абмеркавалі варыянты зніжэння сабекоштасці прадукцыі.

– Яна будзе ніжэй там, дзе ўвесь тэхналагічны працэс ад пачатку стварэння тавару да яго рэалізацыі знаходзіцца ў адной структуры. Стратэгія развіцця Віцебскай вобласці – у стварэнні такіх адзінак. Тады мы знойдзем шляхі зняцця кошту і тавар будзе канкурэнтаздольным, з мінімальнай сабекоштам. Цяпер хлебазаводы знаходзяцца ў рэспубліканскай уласнасці, але мы будзем ставіць пытанне аб вяртанні іх у камунальную, каб аб'яднаць з камбінатамі хлебапрадуктаў, увесці ў інтэграцыйныя структуры, каб вытворчасцю збожжа, яго перапрацоўкай, выпечкай прадукцыі і рэалізацыяй у гандлёвых сетках займаўся адзін уласнік, – сказаў Мікалай Шарстнёў.

Наталля Камлёва. Фота Антона Сцепанішчава. «Віцебскія весці».