Новая аўтазаправачная станцыя адкрылася ў Віцебску

Новая аўтазаправачная станцыя РУП «Беларуснафта — Віцебскаблнефтэпрадукт», якая атрымала прапіску на вуліцы 14-й Полацкай абласнога цэнтра, прымае першых наведвальнікаў. Урачыстае адкрыццё гэтага аб'екта адбылося ў Дзень Незалежнасці.

Старт узвядзенню АЗС, у якую інвеставана 17,5 млрд рублёў (усе сумы да дэнамінацыі), быў пакладзены яшчэ ў лістападзе мінулага года. Новы аб'ект прыдарожнага сэрвісу з кругласутачным рэжымам працы, па словах дырэктара РУП «Беларуснафта — Віцебскаблнефтэпрадукт» Аляксандра Капшуля, дазволіў стварыць дадаткова 12 працоўных месцаў.

Запраўка аснашчана сучасным тэхналагічным абсталяваннем, цалкам адпаведным усім стандартам бяспекі і якасці аказання паслуг. За суткі тут могуць заправіць бензінам з розным актанавым лікам і дызельным палівам 250 машын.

— Улічваючы, што большасць нашых аб'ектаў былі пабудаваны ў 70 — 80-х гадах, неабходна далейшае ўкладанне сродкаў у іх мадэрнізацыю, пашырэнне спектру паслуг, што аказваюцца, устаноўку сучаснага тэхналагічнага і сэрвіснага абсталявання, аўтаматызацыю працэсу прыёму, уліку і адпуску нафтапрадуктаў. У гэтым годзе запланавана рэканструкцыя АЗС №52 у п. Высокае Аршанскага раёна на аўтадарозе М1 Брэст — Мінск — мяжа Расійскай Федэрацыі, — адзначыў Аляксандр Капшуль.

Шырокі спектр паслуг робіць АЗС больш прывабнымі для наведвальнікаў, адзначылі падчас урачыстай цырымоніі адкрыцця новага аб'екта. Сёння аўтазаправачная станцыя — гэта не толькі магчымасць папоўніць бак, але і скарыстацца паслугамі, без якіх у дарозе не абысціся.

Кіраўніцтва вобласці акцэнтавала ўвагу на неабходнасці развіваць комплексны сэрвіс на АЗС рэгіёну, уключаючы пункты грамадскага харчавання, гандлёвыя аб'екты, дзіцячыя пляцоўкі.

Вольга Булавка, «Віцебскія весці».