Новага памочніка Прэзідэнта Беларусі – інспектара па Віцебскай вобласці Аляксандра Субоціна прадставілі актыву Віцебскага аблвыканкама

Аляксандр Субоцін адзначыў, што галоўнае багацце рэгіёну — гэта яго жыхары. «У вобласці жывуць працавітыя людзі, якія могуць усяго дасягнуць і многае зрабіць, калі ім стварыць аптымальныя ўмовы для працы. На гэтым трэба акцэнтавацца — даваць магчымасць спецыялістам, прафесіяналам, работнікам усіх сфер эфектыўна працаваць», — перакананы памочнік Прэзідэнта. Ён таксама адзначыў, што не дзеліць пытанні, якія яму трэба будзе вырашаць, на менш і больш важныя. «Усё важна — і сацыяльная сфера, і прамысловасць, і сельская гаспадарка», — сказаў Аляксандр Субоцін. 

Новага інспектара па Віцебскай вобласці па даручэнні Адміністрацыі Прэзідэнта прадставіў старшыня Віцебскага аблвыканкама Мікалай Шарснёў. Кіраўнік рэгіёну падкрэсліў, што адна з галоўных місій памочніка Прэзідэнта ў рэгіёне — кантроль над выкананнем даручэнняў кіраўніка дзяржавы. Мікалай Шарснёў разлічвае на сумесную эфектыўную працу па вырашэнні праблемных пытанняў, якіх у рэгіёне нямала. «Вы нарадзіліся і выраслі, працавалі тут, таму ведаеце сітуацыю», — дадаў ён.

Аляксандр Субоцін у сваю чаргу адзначыў, што нават у тыя некалькі гадоў, якія працаваў у сталіцы, не губляў сувязі з Віцебскам. «Прыязджаў у выхадныя. Тут жыве мая сям'я. Вобласць мне сапраўды родная. І хацелася б дапамагчы ў яе развіцці. Сумеснымі намаганнямі гэта зрабіць лягчэй», — сказаў ён.

Раней Аляксандр Субоцін займаў пасаду намеснік міністра сельскай гаспадаркі і харчавання — дырэктара Дэпартамента ветэрынарнага і харчовага нагляду. На пасадзе памочніка Прэзідэнта — інспектара па Віцебскай вобласці ён змяніў Аляксандра Пазняка, які цяпер кіруе Аршанскім раёнам на пасадзе старшыні райвыканкама. 

БЕЛТА. Фота "Віцьбічы" і "Віцебскія весці".