Навагоднія кірмашы ў Віцебскай вобласці пачнуцца ўжо з 5 снежня

З 5 снежня 2015 года па 7 студзеня 2016-га на Віцебшчыне па выхадных днях будуць праходзіць кірмашы з удзелам розных прамысловых прадпрыемстваў, арганізацый гандлю і грамадскага харчавання, паведамілі ва ўпраўленні гандлю і паслуг аблвыканкама. Робіцца гэта для таго, каб прапанаваць насельніцтву максімальна разнастайную прадукцыю ў перадсвяточныя і святочныя навагоднія і калядныя дні.

Але ўжо цяпер поўным ходам ідзе падрыхтоўка да зімовых урачыстасцей. Яшчэ да 16 лістапада трэба было маляўніча аформіць усе аб'екты гандлю, грамадскага харчавання, бытавога абслугоўвання. Акрамя таго, мясцовыя ўлады павінны забяспечыць у бліжэйшы час правядзенне выставак-продажаў, распродажаў па зніжаных цэнах, рэкламных акцый з прадастаўленнем скідак на тавары і паслугі, дэгустацый харчовай прадукцыі.

Навагоднія базары пачнуць працаваць 19 снежня. Да гэтай даты ўжо стане вядомы пералік адведзеных для іх пляцовак і цэны, устаноўленыя на навагодніх прыгажунь.

Таксама з 19 снежня па 7 студзеня будзе прадоўжаны рэжым працы аб'ектаў гандлю і грамадскага харчавання.

Лілія Іўчанка, «Віцебскія весці».