Навалукомлю ёсць чым ганарыцца: гараджане сумесна з мясцовымі ўладамі адзначылі юбілей горада
Урачысты парад працоўных калектываў побач з прадстаўнікамі мясцовай улады, канцэрты з удзелам моладзі і дарослых самадзейных артыстаў, забавы для малышоў і іх бацькоў, выязны гандаль, сюрпрызы – такім запомняць гэты Дзень горада навалукомцы.
Да прыкладу, для некаторых стала нечаканасцю, праўда, цалкам заканамернай, атрымаць званне ганаровага жыхара горада. У іх шэрагах апынуўся галоўны ўрач Навалукомльскай цэнтральнай раённай бальніцы Мікалай Пінчук. ЦРБ прызнана лепшай сярод аналагічных устаноў у 2016-м, штогод яе работнікі атрымліваюць ганаровыя ўзнагароды абласных і рэспубліканскіх улад.
Юбілей – час падвядзення вынікаў: чаго дасягнулі, што яшчэ трэба зрабіць. Гораду энергетыкаў ёсць чым ганарыцца.
– Лукомльская ГРЭС – не толькі горадаўтваральнае прадпрыемства, гэта флагман беларускай энергетыкі, прыклад інавацыйных падыходаў і высокаэфектыўных тэхналогій, – адзначыў старшыня Чашніцкага райвыканкама Леанід Плешка. – 70% жыхароў Навалукомля так ці інакш звязаны з ёй, яе спецыялісты запатрабаваны ў адной з самых важных галін нашай краіны, іх майстэрства і веды высока цэняць не толькі ў Беларусі, але і за мяжой.
Сімвалічна, што свята адбылося напярэдадні Дня будаўніка – людзей, дзякуючы якім Навалукомль быў узведзены ў самыя кароткія тэрміны. Але сёння будаўнікі неадрыўна звязаны з лёсам горада: тут ёсць нямала прадпрыемстваў гэтай сферы.
Яшчэ адзін значны гулец на арэне мясцовай прамысловасці – завод керамзітавага жвіру – па выніках 2018-га стаў пераможцам рэспубліканскага конкурсу за лепшыя дасягненні ў будаўнічай сферы, паказаў высокія вынікі сацыяльна-эканамічнага развіцця і эканоміі паліўна-энергетычных і матэрыяльных рэсурсаў. Прадпрыемства на абласной Дошцы гонару, яго дырэктару Міхаілу Лазаравічу, дарэчы, уладальніку звання «Кіраўнік года – 2017», таксама ўручылі Ганаровую грамату аблвыканкама і прысвоілі званне ганаровага жыхара Навалукомля.
У горадзе актыўна развіваецца малы бізнес. Сёлета пачала сваю дзейнасць ПУП «ЛукамольГрупГарант», якая вырабляе таварны бетон і растворы. Адкрыта нямала крам, у тым ліку прыватнай формы ўласнасці. Усё гэта спрыяе стварэнню новых працоўных месцаў, спрыяе занятасці насельніцтва. Мясцовыя бізнесмены імкнуцца не проста ўмацаваць сваю справу, але і пераўтварыць родны горад. Так, за значны ўклад у развіццё Навалукомля адзін з актыўных прадстаўнікоў бізнес-супольнасці горада – індывідуальны прадпрымальнік Максім Калінін – быў адзначаны Ганаровай граматай аблвыканкама.
Горад расце: не так даўно пачата будаўніцтва новага 40-кватэрнага дома, вядзецца рэканструкцыя інтэрната ЛГРЭС пад жылы шматкватэрны дом.
Энергіі Навалукомля можна толькі пазайздросціць: тут шырока папулярны спорт, як сярод дзяцей, так і іх бацькоў. Юнацкія і дарослыя зборныя па міні-футболе прывозяць кубкі з розных спаборніцтваў, у тым ліку рэспубліканскіх і міжнародных. У якасці прыкладу можна прывесці нядаўні «Кубак хмелю»: дзякуючы леташняй вікторыі навалукомскай каманды ўдалося пераманіць турнір па міні-футболе ў горад энергетыкаў, а сёлета зборная «Электрон» пацвердзіла званне пераможцы. Развіты тут і традыцыі стралковага спорту, біятлона. А імёны праслаўленых спартсменаў-навалукомцаў, як, напрыклад, Лідзіі Графеевай, вядомыя па ўсім свеце.
Гараджане ўмеюць не толькі ўдарна працаваць, але і адпачываць з размахам. Калектывы гарадскога Палаца культуры і Дзіцячай школы мастацтваў пастаянна папаўняюць скарбонку ўзнагарод перамогамі на розных конкурсах.
Жыхары Навалукомля клапоцяцца пра тое, каб родны горад быў светлым і чыстым. Добраўпарадкаваннем займаюцца разам. Вядома, яшчэ шмат што трэба зрабіць, планаў на будучыню – маса. Жыхары і мясцовая ўлада ўпэўнены: сіл хопіць на ўсё!