Наваполачанка выкупіла былую сядзібу Фёдаравічаў у Шаркаўшчыне. Усяго больш за 80 аб'ектаў выставіла на таргі «Віцебскаблмаёмасць» на пачатак года
Актыўна стартавалі продажы і сёлета: з пачатку года аб'ём выручаных сродкаў на таргах вырас у 17 разоў у параўнанні з студзенем 2018-га.
Усяго летась прададзена 99 невыкарыстоўваемых аб'ектаў дзяржуласнасці на агульную суму амаль 3 млн рублёў. Па словах начальніка ўпраўлення па распараджэнні дзяржмаёмасцю камітэта Паўла Лук'янава, карысталіся попытам як вытворчыя аб'екты, так і збудаванні сацыяльнага прызначэння. Амаль траціна прададзеных будынкаў — гэта былыя школы, дзіцячыя сады, клубы і бібліятэкі ў сельскай мясцовасці.
Знайшліся пакупнікі і на нерухомасць, спробы распрадаць якую рабіліся на працягу апошніх двух-трох гадоў (будынак казармы па вул. Будзённага і нежылое збудаванне на Смаленскай плошчы ў Віцебску, былы дзіцячы сад у Віцебскім раёне і інш.).
Сярод тэндэнцый 2018-га — інвестары актыўней набывалі прыглянутыя будынкі, упершыню выстаўленыя на таргі
Напрыклад, адзін з такіх аб'ектаў у Паставах купіў за 183 тыс. руб. на апошнім летась аўкцыёне мясцовы індывідуальны прадпрымальнік. У склад лота былі ўключаны адміністрацыйны аднапавярховы будынак 1954 года пабудовы агульнай плошчай больш за 330 кв. м і пляцоўка для аўтатранспарту памерам каля 286 кв. м.
Па словах новага ўласніка, пасля капітальнага рамонту і мадэрнізацыі ён плануе здаваць будынак у арэнду гандлёвым прадпрыемствам. Цяпер патрэба ў падобнай нерухомасці ў раёнах вельмі высокая, а падрыхтаваных аб'ектаў не хапае, дадаў ён.
Захаваўся попыт на пустуючыя збудаванні, прыдатныя для выкарыстання пад жыллё
Летась захаваўся попыт на пустуючыя збудаванні, прыдатныя для выкарыстання пад жыллё. Усяго на такіх аўкцыёнах (за адну базавую велічыню з умовай рэканструкцыі пад жыллё для фізічных асоб) прададзена 6 аб'ектаў.
Аднак нямала выпадкаў, калі ўдзельнікі таргоў, у тым ліку прадпрыемствы і арганізацыі, набывалі будынкі для рэканструкцыі пад жылыя памяшканні, не чакаючы максімальных скідак на лоты, якія іх зацікавілі.
Па словах Паўла Лук'янава, таксама праводзіўся продаж камунальнай маёмасці арандатарам, якія займаюць нерухомасць больш за 3 гады і добрасумленна выконваюць абавязкі па дамовах арэнды. Такім мэтавым чынам рэалізавана 17 аб'ектаў амаль на 1,4 млн руб., а ўсяго з 2013 года арандатарам прададзена больш за 90 аб'ектаў на агульную суму каля 7 млн рублёў.
У студзені-лютым 2019 года на таргі камітэта «Віцебскаблмаёмасць» выстаўлена больш за 80 аб'ектаў нерухомасці, і ў некаторых ужо з'явіліся новыя ўласнікі.
Так, нядаўна па выніках таргоў за адну базавую велічыню прададзены будынак былой сядзібы Фёдаравічаў у Шаркаўшчыне, дзе раней размяшчалася тэрапеўтычнае аддзяленне раённай бальніцы. Уладальнікам гісторыка-культурнай каштоўнасці трэцяй катэгорыі, пабудаванай на пачатку XX стагоддзя, стане жыхарка Наваполацка.