Новую паліклініку ў Воршы ўвядуць у эксплуатацыю ў 2023 годзе

Для жыхароў трох новых мікрараёнаў, якія знаходзяцца ў Задняпроўскім, гэта будзе значная падзея. "Новая паліклініка на вуліцы Магілёўскай будуецца за кошт рэспубліканскага і мясцовага бюджэтаў. З рэспубліканскага бюджэту на яе ўзвядзенне накіруюць Br15 млн. Пры рытмічным фінансаванні аб'ект увядуць у эксплуатацыю ў 2023 годзе", - расказала Алена Гумен. Заказчыкам будаўніцтва з'яўляецца ДКУП УКБ Аршанскага раёна.

Новая ўстанова аховы здароўя будзе складацца з трох рознаўзроўневых блокаў - па 2 паверхі па краях і 5-павярховы блок пасярэдзіне. У самым вялікім размесцяцца аддзяленні для дарослых пацыентаў. У двух іншых на першых паверхах будуць размешчаны педыятрычнае аддзяленне і жаночая кансультацыя, а другія паверхі зоймуць кабінеты спецыялістаў розных напрамкаў.

Паліклініка будзе разлічана на прыём 1150 чалавек у змену, уключаючы 150 маленькіх пацыентаў. Агульная плошча будынка складзе больш за 3,7 тыс. кв.м, у тым ліку 1,1 тыс. кв.м дзіцячага аддзялення. Пакуль не вызначана колькасць пацыентаў, якіх будзе абслугоўваць паліклініка. Магчыма, сюды будуць звяртацца па медыцынскую дапамогу жыхары і іншых мікрараёнаў Оршы.

Ужо сёлета ў Аршанскім раёне будзе здадзена ў эксплуатацыю некалькі сацыяльна значных аб'ектаў. Цяпер ідуць будаўніцтва мемарыяльнага музея Заслонава і капітальны рамонт Дома культуры ў Барані. Таксама працягваюцца работы па пашырэнні праезнай часткі на вуліцы Міра, дзе ў будучыні з'явяцца падземныя пешаходныя пераходы. На гэтыя аб'екты накіраваны бюджэтныя сродкі вобласці і раёна.