Новыя даплаты атрымаюць жывёлаводы Віцебскай вобласці за сваю працу

Удасканалены меры стымулявання работнікаў жывёлагадоўлі па даручэнні старшыні аблвыканкама Мікалая Шарснёва.

Як расказала начальнік упраўлення эканомікі камітэта па сельскай гаспадарцы і харчаванні аблвыканкама Анжэла Нікіціна, новыя рэкамендацыі падрыхтаваны з мэтай матэрыяльнай зацікаўленасці работнікаў сельскагаспадарчай галіны ў канчатковым выніку працы, павышэння прадукцыйнасці, паляпшэння якасці выпускаемай прадукцыі, павелічэння выручкі ў сельгаспрадпрыемствах. Калі раней розныя даплаты і надбаўкі ажыццяўляліся ў першую чаргу за валавыя паказчыкі, то цяпер упор зроблены на якасныя параметры. Рэкамендацыі па мерах стымулявання разасланы ў сельгас арганізацыі і датычацца ўсіх работнікаў галіны ад галоўных спецыялістаў да жывёлаводаў. Напрыклад, спецыялісты могуць атрымаць даплаты за працу па кантракце да 50%, за характар, спецыфіку і складанасць выконваемых работ – да 300%. Па выніках года ў выпадку выканання якасных паказчыкаў прадугледжана прэмія да 50%. Зарплата такой ключавой прафесіі, як аператар па штучным апладненні жывёлы, залежыць ад якасці апладнення кароў і цялушак і выхаду прыплоду. Загадчыкам малочна-таварных ферм і комплексаў розных катэгорый і іншым работнікам жывёлагадоўлі рэкамендавана ажыццяўляць аплату ў памеры да 0,4% ад атрыманай выручкі на канкрэтным аб'екце. Таксама ў выглядзе стымулявання за кожны працэнт прыросту таварнасці малака (максімальная мяжа 95% і вышэй) прадугледжана даплата 0,3% ад выручкі, за рэалізацыю малака сортам «экстра» (100% – 0,2% ад выручкі).

Фінансавы стан сельгаспрадпрыемстваў залежыць ад кожнага работніка. Таму новаўвядзенне заклікана палепшыць якасць прадукцыі, якая вырабляецца, і, як следства, павялічыць выручку гаспадарак і істотна павысіць заработную плату членаў працоўнага калектыву.

Сяргей Ляшук, "Віцебскія весці"