Супрацоўнікі МНС Віцебшчыны расказалі пра простыя правілы бяспекі для дзяцей

Напярэдадні новага навучальнага года ў кожнага бацькі школьніка клопатаў хапае з лішкам: купля сшыткаў, заплечніка, школьнай і спартыўнай формы, абутку, канцылярскіх тавараў. Ёсць яшчэ адзін складнік паспяховага навучання — веданне правілаў бяспекі, папярэджваюць ратавальнікі, якія далі некалькі рэкамендацый татам і мамам.

 

— Настаў момант, якога доўга чакалі, і дзіця пайшло ў школу. Як правіла, у гэты перыяд бацькі пачынаюць прывучаць яго да самастойнасці. Але і ў такія моманты не будзе лішнім падстрахавацца, — параіла старшы інспектар Цэнтра бяспекі жыццядзейнасці і ўзаемадзеяння з грамадскасцю абласнога УМНС Юлія Пахолкина. — Напрыклад, пакідаючы дзяцей дома адных нават на няпроцяглы час, прыбярыце далей калючыя, рэжучыя прадметы, запалкі і запальніцы, лекі і сродкі бытавой хіміі. Такія рэчы трэба захоўваць у недаступных месцах.

У шэсць-сем гадоў дзіця павінна ведаць свой адрас, прозвішча, імя, імя па бацьку бацькоў, суседзяў, бабулі і дзядулі. Пакіньце яму ўсе магчымыя сродкі сувязі. А нумары выкліку экстранных службаў прымацуйце на бачным месцы.

— Асновай бяспекі дзіцяці таксама з'яўляецца веданне элементарных Правілаў дарожнага руху, — адзначыла Юлія Мікалаеўна. — Навучаць ім трэба паступова, пачынаючы з простага. Лепш выбраць адзін маршрут са школы дадому, пазбягаючы малаасветленых або малалюдных месцаў, пад'ездаў.

Мадэлюйце сітуацыі, разважайце разам з дзецьмі, шукайце правільны выхад і заўсёды рабіце акцэнт на тым, што ні пры якіх абставінах нельга панікаваць. Галоўная задача – выратавацца самому і паведаміць своечасова аб тым, што здарылася, дарослым.

Бацькі, не пашкадуйце затрачанага часу і паспрабуйце разам з дзіцем прагаварыць алгарытм дзеянняў у наступных сітуацыях:

Калі дарослых няма дома, а дзверы нехта спрабуе адчыніць.

Неабходна патэлефанаваць бацьку ці маці, а толькі потым набраць службу выратавання
або міліцыю. Размова са спецыялістам можа зацягнуцца, а ў гэты час дарослыя змогуць патэлефанаваць суседзям і папярэдзіць іх аб небяспецы.

З разеткі пайшоў дым, а дома нікога няма.

Трэба хутка пакінуць памяшканне і набраць нумар 112. Пакуль МНС будзе ехаць да месца ўзгарання, лепш звярнуцца да суседзяў. Самастойна тушыць пажар
катэгарычна забаронена!

Калі адчуеш дома пах газу.

Варта неадкладна выйсці з кватэры, патэлефанаваць у дзверы да суседзяў, папрасіць выклікаць службу экстраннага рэагавання. Калі ў суседніх кватэрах нікога не аказалася, абавязкова трэба звязацца з бацькамі.

Калі па дарозе са школы нападзе зграя сабак.

Галоўнае ў гэтай сітуацыі — захоўваць спакой, не правакуючы жывёл на атаку. Нельга глядзець сабакам у вочы, але можна адцягнуць іх увагу любой рэччу:
гэта могуць быць кепка, парасон або сшытак. Трэба акуратна адкінуць прадмет у бок,
а пасля паступова выдаляцца ад зграі, але не паварочвацца да яе спіной.

"Віцебскія весці".