ААТ "Нафтан" у жніўні перапрацавала 160 тыс.т венесуэльскай нафты

27 жніўня, Мінск /Ірына Аніскевіч - БЕЛТА/. ААТ "Нафтан" у жніўні перапрацавала 160 тыс.т венесуэльскай нафты. Аб гэтым карэспандэнту БЕЛТА паведамілі на прадпрыемстве. Першы састаў з нафтай з Венесуэлы стаў на зліўную эстакаду ў ААТ "Нафтан" 31 ліпеня бягучага года. Нафта дастаўлялася з Лацінскай Амерыкі танкерам па моры ў эстонскі порт Мууга, а далей па чыгунцы ў Наваполацк. У порт Мууга прыбыло ўжо тры танкеры з нафтай аб'ёмам 80 тыс.т кожны. Нафта, дастаўленая двума танкерамі, ужо перапрацавана ў Наваполацку, трэці танкер разгружаецца. Па выніках работы за студзень-чэрвень бягучага года ААТ "Нафтан" перапрацавала 3,8 млн.т вуглевадароднай сыравіны. Рэнтабельнасць склала 4,2%. Як адзначылі на прадпрыемстве, у сувязі са змененымі ўмовамі паставак нафты з Расіі ў першым квартале прадпрыемства адчувала цяжкасці, аднак да канца першага паўгоддзя сітуацыя стабілізавалася. Пастаўкі венесуэльскай нафты дазволяць умацаваць фінансава-эканамічнае становішча "Нафтана". Наваполацкі нафтаперапрацоўчы завод "Нафтан" уведзены ў эксплуатацыю ў 1963 годзе, уваходзіць у склад канцэрна "Белнафтахім". Завод спецыялізуецца на выпуску паліўна-алейнай прадукцыі, вырабляе больш за 70 найменняў, у тым ліку масла, бензіны, дызельнае паліва стандарту Еўра-4 і Еўра-5. Каля 70% прадукцыі пастаўляецца ў краіны СНД, Еўрасаюза, на Блізкі Усход і ў ЗША. У канцы 2008 года да ААТ "Нафтан" далучылася ААТ "Палімір", і быў створаны нафтахімічны комплекс. Пагадненне аб пастаўках венесуэльскай нафты ў Беларусь было падпісана ў сакавіку бягучага года. Згодна з дамоўленасцямі прэзідэнтаў дзвюх краін, агульны аб'ём яе пастаўкі павінен скласці за 12 месяцаў каля 4 млн.т. Па дадзеных ЗАТ "Беларуская нафтавая кампанія", з мая бягучага года ў Адэскі порт прыбыло шэсць танкераў з 480 тыс.т венесуэльскай нафты для Беларусі. Яшчэ адзін танкер прыбудзе ў Адэсу, як мяркуецца, на наступным тыдні. Адсюль нафта дастаўляецца па чыгунцы на Мазырскі нафтаперапрацоўчы завод. Яшчэ тры танкеры з 240 тыс.т нафты дастаўлена ў эстонскі порт Мууга, адкуль яна адпраўляецца па чыгунцы ў ААТ "Нафтан". Час перавозкі вуглевадароднай сыравіны па чыгунцы ў Беларусь з Эстоніі карацейшы, чым з Украіны. Паміж Адэсай і Мазыром адлегласць каля 1050 км, паміж эстонскім портам Мууга і Наваполацкам - 850 км.-0-