ААТ "Рудакова" пачало вырошчваць рукколу

1 лютага, Віцебск /Вольга Багачова - БЕЛТА/. ААТ "Рудакова" першым з цяплічных гаспадарак Віцебскай вобласці пачало вырошчваць рукколу, паведаміла карэспандэнту БЕЛТА начальнік цяплічнага камбіната прадпрыемства Раіса Крупаціна. Паводле яе слоў, модны сёння салат-афрадызіяк, які шырока выкарыстоўваецца ў кухні краін Міжземнамор'я і стаў папулярнай стравай у меню лепшых рэстаранаў, вырошчваецца партыямі па 1 тыс. штук пакуль толькі для гандлёвай сеткі абласнога цэнтра. Па меры росту попыту. на культуру аб'ём яе вытворчасці плануецца павялічваць. Культываванне рукколы і базіліка пачалося ў цяплічнай гаспадарцы "Рудакова" сёлета. Удзельная вага гэтых культур пакуль невялікая - па 1%. На думку суразмоўніцы, гэта абумоўлена традыцыямі ў культуры харчавання беларусаў, дзе лідзіруючыя пазіцыі трывала ўтрымліваюць салат, кроп і пятрушка. Попыт на апошнія ўстойліва захоўваецца на працягу ўсяго года. Разам з тым Раіса Крупаціна ўпэўнена, што вітамінную каштоўнасць замежнага салаты таксама прыцягне да сябе ўвагу. Руккола багатая вітамінам С і ёдам, павышае ўзровень гемаглабіну ў крыві, выводзіць халестэрын, аказвае танізавальнае дзеянне на арганізм і станоўча ўплывае на абмен рэчываў. Акрамя таго, у гандлёвую сетку вобласці ўжо пастаўлены першыя сёлета 2 т агуркоў "Рудакова", таматы чакаюцца ў канцы сакавіка - пачатку красавіка, дадала начальнік цяплічнага камбіната. ААТ "Рудакова" спецыялізуецца на агародніцтве і малочным жывёлагадоўлі. У разрэзе вытворчасці 54% прыпадае на агароднінныя і зялёныя культуры абароненага грунту, каля 25% - на малако і 21% займае выпуск мяса, збожжа і агародніны адкрытага грунту. За 2009 год цяплічная гаспадарка выпусціла прадукцыі на Br14,3 млрд., або 5,7 тыс.т, што на 13,1% больш, чым у 2008 годзе. У цэлым па прадпрыемстве за мінулы год выраблена прадукцыі на Br28,5 млрд., што складае 108,5% да ўзроўню 2008 года. Колькасць працаўнікоў - звыш 620 чалавек. Руккола мае ярка выяўлены водар і востры гарчычна-арэхавы прысмак. Дзякуючы сваім карысным уласцівасцям лічыцца эфектыўным сродкам для пахудання, ужываецца як спецыя для салат, мясных страў, прымяняецца пры кансерваванні агародніны.-0-