ААТ "Рудакова" запусціла аўтаномную электрастанцыю

19 сакавіка, Віцебск /Вольга Багачова - БЕЛТА/. ААТ "Рудакова" запусціла сёння аўтаномную электрастанцыю, паведаміў карэспандэнту БЕЛТА дырэктар прадпрыемства Міхаіл Крывенчук. Кошт аб'екта складае Br32 млрд. Электрастанцыя складаецца з дзвюх кагенерацыйных установак магутнасцю 3 тыс. кВт кожная. Асноўная частка атрымліваемых энергетычных рэсурсаў выкарыстоўваецца для стварэння спецыяльнага светлавога рэжыму, неабходнага для вырошчвання агародніны закрытага грунту. Цяпер цяплічная гаспадарка ААТ "Рудакова" зможа вырошчваць іх кругласутачна, а не толькі ў летні перыяд. Штомесяц плануецца вырабляць каля 200 т агуркоў і памідораў. Пры гэтым за кошт выканання светлавога рэжыму іх якасць будзе значна вышэйшай. Больш прывабнай стане і цана агародніны: доля сабекошту энергазатрат у цане прадукту зменшыцца на 20%-25%. Лішкі электраэнергіі прадпрыемства будзе пастаўляць РУП "Віцебскэнерга". Акупіць гэты інвестпраект плануецца за сем гадоў. ААТ "Рудакова" спецыялізуецца на агародніне і малочным жывёлагадоўлі. У разрэзе вытворчасці 54% прыпадае на агароднінныя і зялёныя культуры абароненага грунту, каля 25% - малако і 21% займае выпуск мяса, збожжа і агародніны адкрытага грунту. За студзень-люты 2010 года цяплічнай гаспадаркай ААТ "Рудакова" выпушчана прадукцыі на Br572 млн, што на 54,6% больш, чым за аналагічны перыяд мінулага года. У цэлым па прадпрыемстве за два месяцы гэтага года выраблена прадукцыі на Br2,6 млрд., што складае 105% да адпаведнага ўзроўню мінулага года. Рэнтабельнасць рэалізацыі за 2009 год склала 22%. Колькасць працаўнікоў - звыш 600 чалавек.-0-