ААТ "Віцязь" вырабіла доследны ўзор стацыянарнай электразарадкі для электрамабіляў
ААТ "Віцязь" распрацавала і вырабіла доследны ўзор стацыянарнай электразарадной станцыі, прызначанай для зарадкі акумулятараў электрамабіляў, паведаміў намеснік галоўнага канструктара прадпрыемства Дзмітрый Харын.
Доследны ўзор выпушчаны пад найменнем "Віцязь EC-301". Станцыя прызначана для эксплуатацыі ў публічных месцах і можа быць устаноўлена ў паркінгах, на стаянках гіпермаркетаў і бізнес-цэнтраў, гэта значыць там, дзе машына прастойвае некалькі гадзін, якіх будзе дастаткова для зарадкі. У вырабе ад "Віцязя" інтэрфейс падключэння электрамабіля да зараднай прылады рэалізаваны ў двух відах: трохфазны злучальны раз'ём еўрапейскага стандарту Type 2 і, як універсальны варыянт, бытавая "еўраразетка". Гэта дазваляе выкарыстоўваць айчынную распрацоўку для абслугоўвання электрамабіляў розных вытворцаў, абсталяваных адпаведна адрознымі тыпамі раз'ёмаў.
Станцыя прадугледжвае магчымасць зарадкі акумулятараў электрамабіляў у двух рэжымах - трохфазным пераменным токам (380 В, 32 А, так званы рэжым Mode 3), пры гэтым спатрэбіцца 2-4 гадзіны, а таксама ў аднафазным рэжыме (230 В, 16 А, або рэжым Mode 1), пры гэтым час зарадкі можа скласці да 8-12 гадзін. Сістэма кіравання станцыяй дазваляе ўладальнікам электрамабіляў праводзіць аперацыю з дапамогай загадзя аплачанай бескантактнай карты доступу з выкарыстаннем RFID-тэхналогіі з забеспячэннем усіх неабходных параметраў бяспекі. Таксама прадугледжваецца варыянт доступу да станцыі з дапамогай мабільнай сувязі (SMS-паведамленне на пэўны нумар, альбо з выкарыстаннем мабільнага прыкладання). Для зручнасці і адназначнага ўспрымання стану электразарадной станцыі (гэта значыць для таго, каб вызначыць занятая яна ці вольная) прадугледжана трохкаляровая святлодыёдная індыкацыя на корпусе станцыі, якая ў тым ліку пры ўзнікненні няспраўнасцей сігналізуе аб аварыйнай сітуацыі. Па тэхнічных характарыстыках "Віцязь EC-301" не саступае
замежным аналагам, будзе канкурэнтаздольным па цэнавых параметрах, перш за усё за кошт аптымізацыі элементнай базы, што выкарыстоўваецца, адзначыў Дзмітрый Харын. Пасля завяршэння адпрацоўкі розных нюансаў функцыянавання электразарадной станцыі, выбару аптымальных рашэнняў, у тым ліку з пункту гледжання бяспекі і камфорту для спажыўцоў, і правядзення тэсціравання кампанія плануе запусціць выраб у серыйную вытворчасць, дадаў суразмоўца агенцтва.Віцебскі тэлевізійны завод "Віцязь" утвораны ў 1976 годзе. У 2010-м прадпрыемства акцыянавана з доляй дзяржавы ва ўстаўным фондзе ў 100%. ААТ "Віцязь" спецыялізуецца на вытворчасці тэлевізараў, бытавой тэхнікі, медыцынскага абсталявання і іншых высокатэхналагічных вырабаў.