ААТ «Віцязь» выпусціла пробны ўзор тэлевізара са smart-функцыямі
На нядаўняй выставе ў абласным цэнтры віцебскае прадпрыемства ўпершыню прадставіла доследны ўзор перспектыўнай распрацоўкі – тэлевізар «Віцязь 32LCD861 — 7DC Smart». Узяўшы курс на дыверсіфікацыю вытворчасці, айчынны вытворца, тым не менш, не забывае сваю некалі асноўную спецыялізацыю, выкарыстоўваючы любую магчымасць парадаваць спажыўцоў навінкамі тэлевізійнай тэхнікі.
Наступствуючы актуальнай тэндэнцыі на цесную інтэграцыю лічбавага тэлебачання з Інтэрнэтам, «Віцязь» папоўніў свой мадэльны шэраг «разумным» тэлевізарам (так перакладаецца з англійскай smart). Як распавёў «Віцебскім весткам» вядучы інжынер-канструктар прадпрыемства Тарас Клімчанка, новая распрацоўка акрамя падтрымкі аналагавага і лічбавага тэлебачання забяспечана smart-тэхналогіямі, то ёсць фактычна ператворана ў камп'ютар. Выраб выкарыстоўвае аперацыйную сістэму Android, аднаядзерны працэсар AMLogic (гэта базавая версія, у наступным распрацоўшчыкі прадугледзелі магчымасць пастаноўкі на борт 2 і 4 ядры). Мадэль можа працаваць з шырокім спектрам перыферыйных прылад, уключаючы вэб-камеру і г.п. Падключэнне да Інтэрнэту — праз Wi-Fi або 3G-мадэм. З дапамогай smart-тэлевізара можна спампаваць з Інтэрнэту масу прыкладанняў на любы густ, а значыць, і шматразова пашырыць яго магчымасці.
Традыцыйна «Віцязь» удзяліў асаблівую ўвагу распрацоўцы пульта кіравання, забяспечыўшы яго добрай і зручнай навігацыяй па меню сістэмы. Прылада мае два працоўныя бакі: на верхняй панэлі размешчана кіраванне ТВ-прыёмнікам і пераключэнне ў рэжым курсора, з другога боку — стандартная клавіятура камп'ютара ў мініяцюрным выкананні.
Новая мадэль можа з'явіцца на прылаўках крам ужо ў будучым годзе, калі дазволяць фінансавыя магчымасці вытворцы.
Сяргей Анто́наў, "Віцебскія весці"