Шчодрыя снегапады ў Віцебскай вобласці дапамаглі захаваць пасевы зімой, але могуць загубіць іх вясной - эксперт

19 лютага, Віцебск /Дзіяна Курыло - БЕЛТА/. Стан пасеваў азімых збожжавых і рапсу ў Віцебскай вобласці ацэньваецца як добрае і здавальняючае. Такі вывад зроблены спецыялістамі Віцебскага занальнага інстытута сельскай гаспадаркі НАН Беларусі і раённых інспекцый па насенняводстве, паведаміў карэспандэнту БЕЛТА дырэктар занальнага інстытута Сяргей Якаўчык. Даследаванне проб, узятых на палях рэгіёну, паказала, што па вобласці сярэдні паказчык гібелі раслін складаў 5-10%. Гэта блізка да натуральнай гібелі і адпавядае сярэднерэспубліканскаму паказчыку 8-12%. Разам з тым, 3% даследаваных проб збожжавых паказалі гібель 20% раслін, у 40% проб рапсу гібель склала 20%. Як адзначыў Сяргей Якаўчык, такія паказчыкі ў асноўным назіраюцца ў заходніх рэгіёнах вобласці, дзе, па дадзеных метэаслужбаў, пры невысокім снежным покрыве ў перыяд моцных маразоў у канцы студзеня тэмпература глебы на глыбіні 3 см была мінус 10-13 градусаў, а ў раёне агромецерастанцыі "Шаркаўшчына" пры вышыні снегу не больш за 8 см – на ўзроўні мінус 15–17 градусаў. Такія тэмпературы небяспечныя для азімага рапсу, канюшыны першага года, трыцікале і пшаніцы. Спецыялісты таксама правялі кантроль на паражэнне ўсходаў фітапаталагічнымі захворваннямі і канстатавалі нязначнае паражэнне, якое не перавышае дапушчальных значэнняў. Разам з тым, заклапочанасць аграрыяў выклікае высокі снежны полаг, які пры павышэнні сярэднесутачных тэмператур можа спрыяць грыбковым захворванням. Вышыня снегу вагаецца па вобласці ад 35 см да 50 см, таму для паспяховага выхаду з зімоўкі раслінам неабходна ранняя і дружная вясна. За апошнія 30 гадоў агромецеаралагічных назіранняў складаныя ўмовы зімоўкі былі адзначаны ў канцы снежня 1978 года і ў студзені 1979 года, у снежні 2002-га і ў пачатку студзеня 2003 года. Аднак тэмпература глебы ў гэтыя перыяды пры нязначнай вышыні снегу (8-13 см) ніжэй мінус 12-16 градусаў не адзначалася. У студзені 2006 года тэмпература глебы на глыбіні вузла кушчэння азімых і каранёвай шыйкі траў паніжалася да крытычных значэнняў – мінус 15-20 градусаў і аказалася рэкорднай за ўсе гады агромецеаралагічных назіранняў. -0-